Björn Valur loksins kominn heim: „Þetta reyndi vissu­lega á þol­rifin“

Björn Valur Gísla­son, fyrr­verandi þing­maður Vinstri grænna, er loksins kominn heim til Akur­eyrar eftir að hafa verið sam­fellt á sjónum í fjóra mánuði. Björn er skip­stjóri á franska frysti­togaranum Emer­au­de en rætt er við Björn á vef út­gerðar­fé­lagsins Sam­herja.

Eins og gefur að skilja hefur CO­VID-19-far­aldurinn sett strik í reikninginn hjá mörgum út­gerðar­fé­lögum en á­stæða þess að Björn var svo lengi fjar­verandi var ein­mitt far­aldurinn.

Í á­höfn skipsins eru 36 til 38 manns af ýmsum þjóð­ernum, þar á meðal Frakk­landi, Portúgal og Pól­landi. Veiði­ferðin langa hófst í ágúst þegar Emer­au­de lagði af stað frá Þýska­landi til karfa­veiða á al­þjóð­legu veiði­svæði á milli Noregs og Ís­lands.

Síðan var haldið til þorsk­veiða við Sval­barða. „Veiðin var dræm á köflum en við náðum að fylla skipið og héldum til hafnar í Hollandi um miðjan októ­ber, eftir um 60 daga á sjó. Þar var ætlunin að landa aflanum, taka vistir og hafa á­hafnar­skipti,“ segir hann en á þessum tíma­punkti, eftir tveggja mánaða fjar­veru, voru menn á leið heim til ást­vina sinna.

En far­aldurinn setti strik í reikninginn og þegar skipið átti eftir tvo daga í höfn í Hollandi, þann 16. Októ­ber, var ljóst að staðan í Evrópu var orðin þung með til­liti til út­breiðslu veirunnar.

„Ljóst var að ef á­höfnin færi í land gæti það reynst erfitt að koma hverjum til síns heima og ekki síður yrði það bæði erfitt og á­hættu­samt að fá menn aftur um borð vegna mikillar smit­hættu í flestum löndum Evrópu. Við stóðum enn­fremur frammi fyrir því að ef við færum í land og stoppuðum skipið um tíma til að hvíla á­höfnina, væri al­ger­lega ó­víst hve­nær við kæmumst aftur á sjóinn og sömu­leiðis hvort við myndum þá hugsan­lega lenda í basli við að klára afla­heimildir okkar í tíma til að komast aftur heim fyrir jól og þyrftum þá jafn­vel að eyða bæði jólum og ára­mótum við veiðar. Það var lítil stemning fyrir því hjá á­höfninni,“ segir Björn Valur í við­talinu.

Af tveimur þungum kostum var á­kveðið að halda strax aftur til veiða að lokinni löndun með sömu á­höfn. Haldið var á Sval­barða en Emer­au­de lagðist að bryggju í Frakk­landi þann 15. desember síðast­liðinn eftir 125 daga á sjó.

„Þetta reyndi vissu­lega á þol­rifin í öllum í á­höfninni. Hefð­bundinn túr er í kringum 50 dagar, með 5-7 daga siglingu hvora leið og rúma 40 daga á miðunum. Í þessu til­viki vorum við alls um 100 daga á miðunum og um fjórar vikur á siglingu til og frá höfn auk löndunarinnar í Hollandi. Allir voru þó sáttir þegar upp var staðið.“

Við­talið við Björn Val í heild sinni.