Björn Teitsson, fyrrverandi formaður Samtaka um bíllausan lífsstíl, biðlar til íbúa Reykjavíkur um að láta ekki ljúga að sér vegna húsnæðismarkaðarins, í tísti sem er nokkuð ljóst að er svar við ummælum Einars Þorsteinssonar, oddvita Framsóknar í Reykjavík.
„Að byggja á þéttingarreitum er ekki að tefja neitt. Ekki láta ljúga að ykkur. Það sem tefur og hækkar verð gríðarlega eru risastórir óþarfa bílakjallarar. Svo má ræða að setja hærra hlutfall nýrra íbúða í hagkvæmt húsnæði, það væri mjög skynsamlegt,“ skrifar Björn sem hefur barist fyrir þéttingu byggðar undanfarin ár.
Einar lét hafa eftir sér í Morgunblaðinu í dag að stefna borgarstjórnarmeirihlutans í húsnæðismálum hefði orsakað hátt húsnæðisverkð í Reykjavík.
Sjá einnig: Segir sama meirihluta ávísun á áframhaldandi neyðarástand á húsnæðismarkaði
„Ég er ekki á móti borgarlínu, og ekki á móti því að þétta byggð, en við þurfum að fara í miklu kraftmeiri sókn í húsnæðismálunum. Það er alltaf verið að tala um framtíðina en framtíðin er líka á morgun og það þarf að drífa í þessu,“ segir Einar við Moggann.
Að byggja á þéttingarreitum er ekki að tefja neitt. Ekki láta ljúga að ykkur. Það sem tefur og hækkar verð gríðarlega eru risastórir óþarfa bílakjallarar. Svo má ræða að setja hærra hlutfall nýrra íbúða í hagkvæmt húsnæði, það væri mjög skynsamlegt.https://t.co/WUhHWZHNcx
— Björn Teitsson (@bjornteits) April 19, 2022
