„Ofnotkun á sýklalyfjum og sýklaheftandi efnum líkt og spritti hefur áhrif á þessa míkróflóru. Hvernig það mun þróast, breytast og hafa áhrif á heilsu fólks, það kemur í ljós með tímanum og við þurfum að rannsaka það betur,“ segir Björn Rúnar Lúðvíksson, yfirlæknir ónæmisfræðideildar Landspítalans, í samtali við Fréttablaðið í dag.
Mikil sprittnotkun hefur einkennt daglegt líf okkar undanfarna mánuði enda sprittið eitt það gagnlegasta í baráttunni við útbreiðslu kórónuveirunnar.
Björn Rúnar segir aðspurður að ekki sé vitað hvort mikil sprittnotkun og tíður handþvottur geti haft neikvæð áhrif á ónæmi fólks. Hann segir að þessi mikla sprittnotkun undanfarna mánuði eigi sér engin fordæmi og því erfitt að segja til um áhrifin.
„Við höfum séð það núna að tíðni á öllum smitsjúkdómum nema kynsjúkdómum hefur snarminnkað en þegar við lítum til framtíðar gætum við séð áhrif mikillar notkunar á sýklaheftandi efnum,“ segir hann.
Hann segir að áhrifin verði trúlega greinilegri þegar litið verður til sjálfsofnæmis-, ofnæmis-, geð-, lungna-, hjarta- og æðasjúkdóma. Þetta séu sjúkdómar sem geta verið í nokkur ár að þróast.
Hann segir að ónæmiskerfið okkar sé í stöðugum samskiptum við mikróflóru líkamans. Það sé alltaf að koma betur og betur í ljós að heilbrigð míkróflóra stuðlar að betra ónæmiskerfi og betra taugakerfi. „Þessi kerfi eru öll að tala saman,“ segir Björn í Fréttablaðinu.
Hér má lesa umfjöllunina í heild sinni.
