Björn Leví: Bjarni kannski topp­maður en samt flopp­stjórn­mála­maður

„Niður­staðan hlýtur að segja okkur að þar sé á ferð flopp­stjórn­mála­maður,“ segir Björn Leví Gunnars­son, þing­maður Pírata, í að­sendri grein í Morgun­blaðinu í dag.

Þar gerir Björn Leví mál Bjarna Bene­dikts­sonar fjár­mála­ráð­herra að um­tals­efni, en eins og kunnugt er var Bjarni við­staddur gleð­skap í Ás­mundar­sal á Þor­láks­messu sem lög­regla hafði af­skipti af vegna meintra brota á sótt­varna­reglum.

Björn Leví segist hafa veitt einni til­tekinni at­huga­semd á sam­fé­lags­miðlum at­hygli, en hún var sett undir frétt af málinu. Um­rædd at­huga­semd var ein­föld, en í henni stóð ein­fald­lega „topp­maður“, að sögn Björns.

„Þetta er mjög merki­leg full­yrðing í sam­hengi þeirra at­burða sem við erum að ganga í gegnum. Í sam­hengi þeirrar hegðunar sem birtist okkur á að­fanga­dags­morgun. Í kjöl­far fyrstu frétta af málinu, þar sem ó­ljóst var hvaða ráð­herra hafði sótt fjöl­mennt teiti í mið­bænum, hefur komið fram af­sökunar­beiðni um að húsið hafi fyllst á þeim 15 mínútum sem ráð­herra var í sam­kvæminu. Af­sökunar­beiðni sem lætur sótt­varna­brotið líta út fyrir að vera yfir­sjón og ó­heppi­legt hliðar­spor í annars vel heppnuðum kúlu­jólum. Dag­bók lög­reglu og vitni lýsa at­burðum Þor­láks­messu hins vegar á annan hátt. Húsið hafi verið troð­fullt þegar ráð­herra bar að garði og hann hafi verið þar nær klukku­tíma en 15 mínútum. Ekki er nóg með að ráð­herra hafi þannig brotið sótt­varna­lög heldur er af­sökunar­beiðnin full af rang­færslum um at­vik máls.“

Björn Leví segist ekki efast um að Bjarni sé á­gætis faðir, afi og eigin­maður. „Að hann reynist vinum og fjöl­skyldu vel og sé í allan stað topp­maður á þeim vett­vangi. Slíkt á­gæti yfir­færist hins vegar ekki sjálf­krafa yfir í pólitíkina,“ segir Björn og bendir á að það að vera góður í fót­bolta geri mann ekki að góðum stjórn­mála­manni og að vera góður að baka geri mann ekki að góðum stjórn­mála­manni.

„Kannski er lík­legra að topp­maður sé góður stjórn­mála­maður en ein­hver auli en það er ekki sjálf­sagt og af verkunum skuluð þið þekkja þá. Það er mjög skiljan­legt að við reynum að velja topp­fólk í á­byrgðar­stöður. Það ætti því að vera jafn skiljan­legt að við hættum að velja fólk sem stendur ekki undir þeirri á­byrgð.“

Björn Leví segir að Katrín Jakobs­dóttir, for­sætis­ráð­herra og for­maður VG, hafi kallað þetta sótt­varna­hliðar­spor og Sigurður Ingi Jóhanns­son, for­maður Fram­sóknar­flokksins, kallað málið ó­heppi­legt og minnt á stóru myndina. Þegar menn hafi beðist af­sökunar og út­skýrt mál sitt eigi að vera svig­rúm til að virða það og fyrir­gefa.

„En er þetta hliðar­spor eða hluti af ein­beittum brota­vilja? Það muna allir eftir vin­konu­hittingi annars ráð­herra úr sama flokki frá því rétt fyrir vetrar­bylgjuna. Það ættu allir að kannast við and­mæli þing­manna sama flokks um sótt­varna­að­gerðirnar. Að auki lítur út fyrir að ekki sé allt satt og rétt í af­sökunar­beiðninni. Hvernig á að bera virðingu fyrir því? Hvernig á fyrir­gefning að geta byggst á slíkri af­sökunar­beiðni? Já. Fjár­mála­ráð­herra er kannski topp­maður. En það verður seint hægt að sýna fram á þá eigin­leika á stjórn­mála­ferli hans, allt frá sögunni um sjóð 9 til skatta­skjóls­skýrslna og til sótt­varna­brota. Niður­staðan hlýtur að segja okkur að þar sé á ferð flopp­stjórn­mála­maður.“