Björn Ingi Hrafnsson, fjölmiðlamaður og fyrrverandi borgarfulltrúi, segir að framundan séu athyglisverðir tímar í Sjálfstæðisflokknum.
Guðlaugur Þór Þórðarson er talinn ætla að gera atlögu að formannsstólnum á landsfundi Sjálfstæðisflokksins um aðra helgi og færi hann þá gegn sitjandi formanni, Bjarna Benediktssyni, sem lýst hefur vilja til að leiða flokkinn áfram.
Guðlaugur Þór sagði í viðtölum í gær að hann hefði fengið fjölda áskorana um að bjóða sig fram. Þá sagði hann að staða flokksins væri ekki góð, með tilliti til niðurstaðna kosninga á undanförnum árum, og við því þyrfti að bregðast. Guðlaugur sagðist þó ekki vera búinn að gera upp hug sinn; ef hann færi fram fengi Bjarni fyrstur manna að vita það.
Björn Ingi segir að málið eigi sér líklega dýpri rætur en það.
„Eins og valdataflið blasir við mér í Valhöll meta Guðlaugur Þór og stuðningsmenn hans það svo, að Bjarni Benediktsson hyggist skáka honum úr ríkisstjórn á næstunni í stað Jóns Gunnarssonar sem á að vera áfram. Guðrún Hafsteinsdóttir komi inn í ríkisstjórn, en ekki í dómsmálaráðuneytið eins og til stóð,“ sagði Björn Ingi á Facebook-síðu sinni í gærkvöldi.
„Þess vegna fer allt á fullt; góðum og gegnum sjálfstæðismönnum kippt út af skrá um landsfundarfulltrúa og augljóst að hörð kosningabarátta er framundan. Kannski er atburðarás farin af stað sem ekki er hægt að stöðva öðruvísi en með kosningu og hreinu uppgjöri, því hafi Bjarni ekki verið áður búinn að ákveða að setja Guðlaug Þór af, er næsta víst að hann geti vart annað nú, nái hann endurkjöri, þar sem erfitt er að vera flokksformaður í ríkisstjórn með ráðherra úr eigin flokki sem hefur eiginlega lýst á mann vantrausti,“ segir Björn Ingi og endar færsluna á þessum orðum:
„Nú kemur í ljós hversu stór og öflugur Hulduherinn er í raun og veru. Þetta eru athyglisverðir tímar.“
