Björn Ingi Hrafnsson, ritstjóri Viljans, varpaði áhugaverðri spurningu fram á upplýsingafundi almannavarna nú í morgun.
Eins og flestir vita fer einn mikilvægasti landsleikur í sögu íslenska karlalandsliðsins fram í kvöld þegar við mætum Ungverjum í Búdapest í úrslitaleik um hvort liðið fær sæti í lokakeppni Evrópumótsins næsta sumar. Leikurinn verður sýndur í beinni útsendingu á Stöð 2 Sport sem er áskriftarstöð.
Björn Ingi sagði að margir hefðu áhyggjur af því, þar sem leikurinn er í lokaðri dagskrá, að margir myndu kannski reyna að fara í heimsóknir til að horfa á leikinn. Spurði hann hvort nú væru ekki réttu aðstæðurnar til að hvetja til þess að leikurinn yrði sýndur í opinni dagskrá.
Víðir sagði að spurningin væri áhugaverð og hann hefði fengið ábendingu um þetta í gær. Hann hafi skoðað málið og komist að því að hægt sé að kaupa aðgang að leiknum fyrir þúsund krónur. „Það er 1/3 af verði ódýrasta miða sem öllu jafna er í boði á landsleiki. Kannski er upphæðin ekki af þeirri stærðargráðu að það ætti að hindra fólk í að kaupa miða á leikinn,“ sagði Víðir.
