„Ég hef ítrekað verið spurður að undanförnu hvort ég ætli að láta bólusetja mig þegar röðin kemur að mér,“ segir Björn Ingi Hrafnsson, ritstjóri Viljans og höfundur bókarinnar Vörn gegn veiru, í pistli á vef Viljans.
Í pistlinum greinir Björn Ingi meðal annars frá því að hann vinni nú að framhaldi bókar sinnar sem kom út í haust. Gerir Björn Ingi ráð fyrir að nýja bókin komi út um það leyti sem búið verður að bólusetja meginþorra þjóðarinnar, lok mars eða þar um bil.
Björn Ingi gerir einmitt bólusetningar gegn veirunni að umtalsefni en nú er farið að hylla undir það að bóluefni komist í almenna dreifingu.
Hann segist ítrekað hafa verið spurður að því hvort hann ætli að fá bóluefni.
„Einkum hafa þeir spurt sem hafa efasemdir um hraða þróun bóluefnanna, eru hræddir við mögulegar aukaverkanir og óttast samfélagslegan þrýsting eða jafnvel lagaskyldu um bólusetningar við þessar aðstæður,“ segir Björn Ingi en það er skemmst frá því að segja að hann ætlar að þiggja bóluefni þegar röðin kemur að honum.
„Markmið bólusetningar er að vernda fólk fyrir COVID-19 og að ná upp hjarðónæmi sem hindrar útbreiðslu faraldursins hér á landi og um alla heimsbyggðina. Það er ekkert smá verkefni. Þórólfur sóttvarnalæknir hefur sagt að til þess að ná hjarðónæmi þurfi að bólusetja um 60% þjóðarinnar. Það eru mörg hundruð þúsund skammtar, sé tekið tillit til þess að stærstur hluti þeirra sem fæddir eru fyrir 2005 verði bólusettir. Ég tel því samfélagslega mikilvægt að taka þátt, bæði til að verja mig og aðra og stuðla að hinu langþráða hjarðónæmi sem leggur faraldurinn að endingu að velli. Því fleiri sem hugsa eins, þeim mun fyrr náum við því markmiði og getum aftur horft fram á eðlilegt líf. Með félagslegum athöfnum, óskertu athafnafrelsi og upprisu heilu atvinnugreinanna. Það er því til mikils að vinna.“
Björn Ingi vísar í orð Svandísar Svavarsdóttur heilbrigðisráðherra þess efnis að hún vonaðist til þess að þessum umfangsmestu bólusetningum í sögu þjóðarinnar verði lokið að mestu fyrir lok fyrsta ársfjórðungs 2021.
„Það er í marslok. Það er þá líklega viðeigandi að um það leyti komi út seinna bindi bókaflokksins Vörn gegn veiru eftir mig, þar sem seinni hluti veirufaraldursins hér á landi er skrásettur; farið yfir atburði á borð við hópsmitið á Landakoti, vaxandi deilur um sóttvarnaráðstafanir og pólitíska spennu samfara kólnun atvinnulífsins. Sú bók er langt komin, en skrifar sig eiginlega sjálf þessa dagana og þetta væri því kjörinn tími fyrir útgáfuna. Ég leyfi mér að vona að viðtökurnar verði jafn góðar og með fyrri bókina sem kom út í haust.“
Hér má lesa pistil Björns Inga í heild sinni.
