Björn Ingi: Eina flóttaleiðin úr borginni upp Ártúnsbrekku – Sundabraut nauðsyn eftir atburðina í gær

Björn Ingi Hrafnsson, fjölmiðlamaður og fyrrverandi borgarfulltrúi, segir að eftir atburði gærdagsins voni hann innilega að meirihlutinn í borginni hætti að leggja sífellt stein í götu þess að Sundabraut verði að veruleika. Dagur B. Eggertsson borgarstjóri segist ekki kannast við þessa „steina“.

„Það verður að vera önnur flóttaleið út úr borginni en upp Ártúnsbrekku ef eitthvað gerist á Reykjanesinu. Tala nú ekki um ef eitthvað gerist í Bláfjöllum eða á Hengilsvæðinu. Það verður að tryggja beina leið út á Sundin og yfir Flóann áður en það verður of seint,“ segir Björn Ingi.

Björn Ingi segir að eldgos við Kleifarvatn gæti til dæmis kallað á skyndirýmingu stórra svæða á höfuðborgarsvæðinu. Hrina öflugra jarðskjálfta reið yfir höfuðborgarsvæðið í gær og hafa vafalítið margir hugsað til þess með hrolli að eldgos væri hugsanlega í vændum.

Dagur segir að stefna borgarstjórnar varðandi Sundabraut hafi verið mörkuð þegar þeir báðir áttu sæti í borgarstjórn árið 2008.

„Fjöldarýming er mjög margslungið fyrirbæri og sagan geymir lærdómsrík dæmi um það að slíkar rýmingar hafi orðið fleirum að aldurtila en hin raunverulega ógn - og voru þó allir að gera sitt besta. Kristnihátíðim árið 2000 er eina raunverulega æfingin sem við höfum prófað í þessu (reynt að skipuleggja massaflutninga með einkabílum á þjóðvegum) og það var eins gott að þjóðin þurfti ekki að halda til í marga sólarhringa á Þingvöllum,“ segir hann.

Hann bætir við að það sé mjög líklegt að eldgos verði á Reykjanesi en jarðfræðingar hafi hingað til talið líklegast að það verði eftir 100 til 200 ár og líklegast fyrst í Brennisteinsfjöllum. Hann viðurkennir að þetta geti breyst og sé í sífelldu mati, samanber atburðina við Þorbjörn í fyrra þar sem talið var að um kvikuinnskot væri að ræða.

Dagur bendir á að sú eldfjallavá sem helst gæti steðjað að höfuðborgarsvæðinu sé öskufall, loftmengun og hraunrennsli. Þá geti eldsumbrot haft í för með sér afleiddar hættur, flóðbylgjur sem dæmi.

„Miðað við þau gögn sem ég hef séð er lang-líklegast er öskufall væri stóra viðfangsefnið ef (og þegar) til kemur. Það er vegna fjarlægðar frá þekktum eldstöðvum og þekkta lengd hraunrennslis frá þeim,“ segir Dagur og bendir á að sex eldstöðvakerfi sé að finna innan 50 km frá miðborg Reykjavíkur.

„Þau eru Reykjanes (42 km), Krýsuvík (26km), Brennisteinsfjöll (23 km), Hengill (29 km), Hrómundartindur (30 km) og Grímsnes (50 km). Mesta lengd þekktra hraunstrauma á sögulegum tíma frá hverju kerfi um sig er þessi: Reykjanes 30 km, Krýsuvík 12 km, Brennisteinsfjöll 15 km, Hengill 10 km, Hrómundartindur 5 km og Grímsnes 7 km. Þetta eru allt upplýsingar úr Hættumati fyrir höfuðborgarsvæðið sem almannavarnir á höfuðborgarsvæðinu gáfu út árið 2014.“