Björn Ingi Hrafnsson, ritstjóri Viljans og höfundur bókarinnar Vörn gegn veiru, hefur litla trú á því að rekja megi þau dauðsföll á hjúkrunarheimilum sem greint hefur verið frá undanfarna daga til bóluefnis Pfizer.
Í tilkynningu sem Lyfjastofnun sendi frá sér í dag kemur fram að tilkynnt hafi verið um fimm alvarlegar aukaverkanir, þar af fjögur andlát, sem hugsanlega kunna að tengjast bólusetningu við veirunni. Í öllum tilfellum var um að ræða aldraða einstaklinga með undirliggjandi sjúkdóma sem búa á hjúkrunarheimilum. Landlæknir, sóttvarnalæknir og forstjóri Lyfjastofnunar hafa ákveðið að fá óháða aðila til að fara gaumgæfilega yfir þessi fimm alvarlegu tilvik.
Björn Ingi segir að sjálfsögðu þurfi að skoða vandlega hvort eitthvert orsakasamhengi er milli bólusetningar og umræddra dauðsfalla í hópi eldri borgara. Þá þurfi að greina hiklaust frá öllum niðurstöðum til að forðast tortryggni og að jarðvegur skapist fyrir samsæriskenningar.
„En gleymum ekki að í viku hverri látast 10-20 manns á hjúkrunarheimilum hérlendis, oft elsta og viðkvæmasta fólkið. Það var einmitt þetta fólk sem var bólusett fyrir áramót. Það eru því allar líkur á að annað en bólusetning hafi valdið andlátinu. Erlendis hafa slík tilfelli ekki komið upp enda þar ekki tilkynnt sérstaklega um eðlilegan dauðdaga á hjúkrunarheimilum, þau eru lífsins gangur,“ segir Björn Ingi í færslu sinni á Facebook sem endar með þessum orðum:
„Blessuð sé minning hinna látnu en ég vona að fólk geri sér ljóst að löngu væri búið að stöðva bólusetningar um allan heim ef bóluefnið væri svo hættulegt. Það hefur ekki verið gert, heldur er hafin umfangsmesta bólusetning í sögu mannkyns og barist um hvern einasta skammt.“
