„Væri ég kórónaveira væri ég nú á leiðinni til Egyptalands - það er best að slá þar sem grasið er þéttast,“ segir Björn Birgisson Grindvíkingur í pistli á Facebook-síðu sinni.
Íslenska karlalandsliðið í handbolta býr sig nú undir HM í Egyptalandi, en liðið mætir Portúgal í fyrsta leik á fimmtudagskvöldið. Sú ákvörðun að halda mótið hefur verið umdeild en kórónuveirufaraldurinn síst í rénun í heiminum enda bóluefni rétt nýkomið á markað.
Björn spyr hvenær hámarki heimskunnar sé náð og bætir við að þeir sem stjórna Alþjóðahandknattleikssambandinu (IHF) hljóti að vera nærri því markmiði.
„Nokkrum dögum fyrir heimsmeistaramót - sem ótrúlega vitlaust er að halda nú - fallast þeir loksins á að leika með takmörkuðum áhorfendafjölda - þegar enginn ætti að vera í áhorfendastúkunum.“
Þá bætir hann við að til dæmis Tékkar, Bandaríkjamenn, Svíar og Brasilíumenn séu í vandræðum vegna veirunnar og örugglega fleiri lið líka. Í morgun var til dæmis greint frá því að átján leikmenn bandaríska liðsins væru smitaðir af kórónuveirunni.
„Til Egyptalands er stefnt liðum úr öllum hornum heimsins einmitt nú þegar veiran er á mikilli siglingu upp á við og bólusetningar rétt nýhafnar. Er hægt að hugsa sér betri smitleið? Er handbolti mikilvægari en líf og heilsa leikmanna og þeirra sem liðunum fylgja?“
Björn segist ekki í nokkrum vafa um að hann myndi skella sér til Egyptalands ef hann væri kórónuveira.
„Það hafa alltaf staðið deilur um IHF, ásakanir um spillingu annað veifið, einnig hlutdrægni - og nú þetta. Þvílíkur bjálfaháttur!“
