Grindvíkingurinn Björn Birgisson liggur sjaldnast á skoðunum sínum eins og þeir sem til hans þekkja vita. Hann hikar sjaldnast við að láta menn heyra það ef svo ber undir en hann á sér líka öllu mýkri hlið.
Í færslu á Facebook-síðu sinni hrósar hann Svandísi Svavarsdóttur heilbrigðisráðherra í hástert, en óhætt er að segja að hún hafi haft í mörg horn að líta undanfarna mánuði.
„Svandís Svavarsdóttir, heilbrigðisráðherra, hefur ekki átt sjö dagana sæla um nokkurt skeið. Erfið veikindi í fjölskyldunni og nýbúin að fylgja föður sínum til grafar,“ segir Björn sem bætir við að COVID-ástandið hafi ekki verið til að létta henni lífið.
„Til viðbótar því með allt úrtöluliðið á bakinu sem gerir allt sem í þess valdi stendur til að gera flest tortryggilegt sem gert er í sóttvörnum og útvegun bóluefnis gegn veirunni og hikar ekki við að gera þá baráttu að pólitísku bitbeini - heimskulegt sem það nú er.“
Björn segir að svo sannarlega stæðu ekki allir keikir í framlínunni við þessar aðstæður. „En það gerir Svandís Svavarsdóttir. Bogin en ekki brotin. Hún er nagli. Heiður þeim sem heiður ber.“
