Björn Jónsson, sem starfað hefur lengi í ferðaþjónustunni hér á landi, er nú í stöðu sem hann hefur ekki verið í áður. Hann er atvinnulaus og segir að nú taki nýir tímar við eftir rúman áratug á besta vinnustað landsins.
Björn skrifar um stöðu ferðaþjónustunnar í athyglisverðri grein á Vísi. Eins og kunnugt er hefur ferðaþjónustan átt erfitt uppdráttar undanfarna mánuði vegna COVID-19 faraldursins og útlitið fram undan er ekki beint bjart.
„Fullt af góðu fólki er að missa vinnuna, fyrirtæki verða gjaldþrota og önnur loka tímabundið, í von um betri tíð síðar. Eitthvað sem enginn getur sagt til um með vissu hvort eða hvenær verði. Þau fyrirtæki sem eftir standa, verða ekki svipur hjá sjón, miðað við fyrir heimsfaraldur. Ákvarðanirnar sem þessu valda, virðast hafa verið teknar án samtals við þá sem þær bitna einna helst á og áætlun um næstu skref virðist ekki vera til staðar,“ segir Björn í grein sinni.
Hann segir að atburðir síðustu mánaða hafi skapað allskonar tilfinningar og eðlilegt sé að þessar tilfinningar finni sér farveg.
„Einn farvegurinn er að finna sökudólga, finna einhvern (eða eitthvað) til að kenna um ástandið,“ segir Björn sem segist þó ekki viss um að það hjálpi okkur í þeirri stöðu sem við erum í.
„Ferðaþjónustan hefur ekki farið varhluta af þessu og margir kennt henni um að veiran hafi sprottið upp aftur. Vinsælt tónlistarfólk hefur m.a. öskrað hátt á samfélagsmiðlum og háskólaprófessorar sagt nánast að réttlætanlegt sé að fórna ferðaþjónustunni, að því virðist vera án rökstuðnings. Samfélagsmiðlar eru stútfullir af pistlum og athugasemdum um græðgi og frekju fyrirtækjanna í ferðaþjónustu, sem hugsa bara um eigin hagsmuni og vilji einungis græða peninga á erlendum ferðamönnum. Það eina sem þessi fyrirtæki eru þó að reyna, er að bjarga störfum og verðmætum,“ segir Björn.
Hann segir að fyrirtæki séu lítið annað en fólkið sem þar vinnur. Það ber ekki vott um græðgi að vilja bjarga störfum fólks og skapa verðmæti, svo hægt sé að borga fólki laun. Laun sem fólk notar út í samfélaginu. Það séu því hagsmunir allra að sem flestir hafi vinnu.
„Þessar hugleiðingar mínar skrifa ég, í stöðu sem ég hef ekki áður verið í á lífsleiðinni, en þ.e. án atvinnu. Ég er einn fjölmargra sem þurfa nú að kveðja frábæran vinnustað, yndislega samstarfsfélaga og góða vini. Það er sárt,“ segir Björn og bætir við að það sé líka sárt að lesa um og heyra talað um græðgi ferðaþjónustunnar.
„En eins og áður segir, líður okkur öllum alls konar. Við erum öll að reyna okkar besta. Reyna að fóta okkur í veruleika sem sem við fæst kærum okkur um. Ég er hins vegar sannfærður um að við komumst í gegnum þetta ástand m.a. með auknu umburðarlyndi, færri ásökunum og auknum skilningi á mismunandi aðstæðum. Bóluefni myndi heldur ekki skemma fyrir. Ég er líka sannfærður um það, að fljótlega munum við aftur taka á móti erlendum ferðamönnum, með sama myndarskap og við höfum gert í gegnum árin,“ segir Björn sem endar pistilinn á þessum orðum:
„Eftir rúman áratug á besta vinnustað landsins, taka við nýir tímar hjá mér. Ég veit ekki hvað framtíðin ber í skauti sér, en ég veit þó að hún býður upp á ný tækifæri og valmöguleika. Það er mitt að nýta það. Það er best að takast á við það með jákvæðni, opnum hug og muna að gleyma ekki gleðinni.“
