Björgólfur Thor Björgólfsson fjárfestir hefur flogið upp lista Forbes yfir ríkustu menn í heimi að undanförnu. Nýr listi var gefinn út í dag og þar fer Björgólfur upp um 99 sæti, úr 1.215. sæti í fyrra upp í 1.116 sæti í dag. Mbl.is greinir frá.
Í Forbes kemur fram að auður hans sé metinn á 2,1 milljarð Bandaríkjadala eða um 254 milljarða íslenskra króna á gengi dagsins í dag. Þá er tekið fram að Björgólfur eigi hlut í fjarskiptafyrirtækjunum Play frá Póllandi og WOM frá Síle. Hann hefur einnig fjárfest í rafmyntum og sprotafyrirtækjum á borð við Zwift, BeamUp og Deliveroo. Forbes segir einnig að Björgólfur Thor sé eini milljarðamæringur Íslands í Bandaríkjadölum talið.
Fréttablaðið greinir frá því að Björgólfur Thor hafi efnast á því að stofna brugghúsið Bravo í Rússlandi og selja það til Heineken árið 2002. Árið 2006 setti Forbes hann í 350. sætið yfir auðugasta fólk í heimi og taldi virði eigna hans vera 2,2 milljarða dollara.
Þá rifjar Forbes upp að Björgólfur Thor hafi tapað nánast öllum auðæfum sínum í fjármálahruninu árið 2008 og hafi þurft að leita leiða til þess að greiða niður skuldir sínar, sem námu meira en einum milljarði dollara.
