Björg Guðmundsdóttir sameindalíffræðingur segir að ekki sé hægt að halda því fram að lífið gangi sinn vanagang þar sem hún býr. Björg er búsett í Montgomery-sýslu í Maryland á austurströnd Bandaríkjanna.
Hún skrifar athyglisverða grein í Fréttablaðið í dag sem veitir ákveðna innsýn inn í það hvernig lífið er í Bandaríkjunum á tímum COVID-19 faraldursins. Hún segir að tilefni skrifanna sé að í umræðu síðustu daga um aðgerðir á landamærum Íslands vegna COVID-19 hafi komið fram að lífið gangi að mestu sinn vanagang í Boston á austurströnd Bandaríkjanna.
Flest allt lokað
„Ég hef enga reynslu af því að búa í Boston en ég hef reynslu af því að búa í annarri borg á austurströnd Bandaríkjanna á tímum COVID-19, sem valdið hefur dauða tæplega 200.000 Bandaríkjamanna,“ segir Björg og bætir við að hún og fjölskylda hennar búi í Silver Spring í Montgomery-sýslu.
„Hér hefur margt verið gert til að reyna að hefta útbreiðslu veirunnar sem veldur COVID-19. Almennir skólar hafa verið lokaðir frá því 16. mars og verða lokaðir áfram a.m.k. þar til í janúar 2021. Þetta er gríðarleg frelsisskerðing fyrir börnin og hefur áhrif á möguleika margra foreldra til að stunda vinnu. Það er ekki í boði að borða inni á veitingastöðum. Kvikmyndahús, bingó og önnur afþreying innanhúss er lokuð en líkamsræktarstöðvar geta nú hleypt inn takmörkuðum fjölda gesta – 1 á hverja 20 fermetra og eru þeir þá með grímur við æfingar,“ segir hún.
Hún segir að þau hjónin hafi verið heima mánuðum saman, en fái nú takmarkaðan tíma á vinnustaðnum til að sinna tilraunavinnu. Skiptast þau þá á við annað starfsfólk.
„Skrifstofufólk á okkar vinnustöðum hefur unnið heima frá því um miðjan mars og svo verður áfram ótímabundið. Við munum seint kalla þetta vanagang á lífinu,“ segir hún.
Fyrsta bylgjan enn í gangi
Björg bendir á að íbúar Montgomery-sýslu séu rétt rúmlega ein milljón, eða þrisvar sinnum íbúafjöldi Íslands.
„Alls eru 20.766 staðfest tilfelli af COVID-19 í sýslunni frá 17. mars og af þeim hafa 789 manns látist (3,8%). Fólk sem var einhverjum kært. 12,6% jákvæðra hafa verið 70 ára og eldri og í þeim hópi er dánarhlutfallið 22,4%. Aðgerðirnar hafa klárlega skilað árangri en þrátt fyrir alla þessa röskun á daglegu lífi er meðaltal smita fyrir júlí og ágúst, eftir að náðist að fletja hæsta kúfinn, um 81 smit á dag. Dánarhlutfallið er lægra en í vor en það er samt sem áður 1,7%. Það þýðir að við höfum enn ekki náð að klára fyrstu bylgju faraldursins.“
Ekkert lát er á faraldrinum í Montgomery-sýslu og bendir Björg á að í gær hafi greinst 140 ný tilfelli, en það myndi samsvara 48 tilfellum miðað við höfðatölu á Íslandi. Þá séu 62 á spítala, þar af 19 á gjörgæslu og tveir hafi látist í gær.
„Allan þennan tíma, í 26 vikur samfleytt, hafa nýgreind tilfelli aðeins 4 sinnum verið færri en 50 á sólarhring. Það mun svo koma í ljós hvað gerist ef slakað verður á sóttvörnum of snemma.“
„Mynduð þið vilja skipta?“
Björg segir að árangur af tvöföldu skimuninni á landamærum Íslands sé ótvíræður.
„Það er ljóst að Montgomery-sýsla er ekki eyja og það gengur ekki að láta alla sem koma inn í sýsluna fara í próf, í sóttkví í 5 daga og fara svo aftur í próf. Það er ekkert annað í boði en að íbúar sýslunnar fari áfram eftir þessum stífu reglum og það gengur misvel. Einstaklingar í áhættuhópum lokast æ meira af eftir því sem fleiri haga sér eins og faraldurinn sé yfirstaðinn. Sumir kjósa sem sé að vera partur af vandanum en ekki lausninni,“ segir Björg sem hefur ákveðin skilaboð til þeirra Íslendinga sem kalla eftir því að slakað verði á aðgerðum.
„Snör og vel ígrunduð viðbrögð íslenskra sérfræðinga og yfirvalda og það frelsi sem aðgerðirnar á landamærunum hafa leitt til, standa okkur ekki til boða. Leiðið kannski hugann til okkar í Montgomery-sýslu ef þið getið farið á tónleika (eða getið haldið tónleika), næst þegar þið setjist inn á veitingastað, eða það sem mikilvægast er, næst þegar barnið ykkar kemst í skólann og þið farið til vinnu. Mynduð þið vilja skipta?“
