Bjarni Benediktsson, formaður Sjálfstæðisflokksins og fjármálaráðherra, hefur sent frá sér aðra færslu á Facebook þar sem hann fer hörðum orðum um fréttaflutning um yfirheyrslur á fjórum blaðamönnum í tengslum við umfjöllun um skæruliðadeild Samherja.
Bjarni fékk á sig harða gagnrýni fyrir fyrri færslu sína þar sem hann gagnrýndi fréttastofu RÚV harðlega.
„Ég benti á að ekki væri innistæða, á þessu stigi máls, til að gera athugasemdir við að lögregla óskaði eftir því að taka skýrslur af fréttamönnunum, enda væri málið einfaldlega til rannsóknar. Það eina sem við vitum með vissu um rannsóknina er að hún varðar brot á friðhelgi einkalífs,“ segir Bjarni.
„Ekki stóð á viðbrögðunum, en þau voru, af einhverjum sökum, að uppistöðu til eins og málflutningur í allt öðru máli en því sem ég hafði stefnt mér inn í.“
Bjarni segir að hann hafi ekkert verið að tjá sig um stöðu blaðamanna í lýðræðissamfélagi, að dómafordæmi væru fyrir því að blaðamenn þyrftu ekki að gefa upp heimildarmenn eða að sérlög væru um blaðamenn.
„Ég velti því hins vegar upp hvort allir væru jafnir fyrir fjölmiðlunum, því mér hefur fundist sem efnistök og allur fréttaflutningur í þessu máli væri frábrugðinn því þegar almennir borgarar eiga í hlut. Á þessu stigi málsins finnst mér auk þess engin innistæða fyrir uppþoti vegna boðunar í skýrslutöku, en fréttir hafa mest byggt á forsendum þeirra sem hafa réttarstöðu sakbornings í málinu, um það hvað þeir telja að til standi að spyrja þá um,“ segir hann.
Beinir hann svo orðum sínum að Sigríði Dögg og Sigríðu Hagalín:
„Ég fékk engin viðbrögð frá Ríkisútvarpinu við þessum vangaveltum og er ekki að bíða eftir þeim. Í gær birtist hins vegar svar, eða yfirlýsing, frá Blaðamannafélagi Íslands og Félagi fréttamanna, sem er stéttarfélag fréttamanna Ríkisútvarpsins. Það hefur eflaust verið fyrirhafnarlítið fyrir formennina tvo, þær Sigríði Dögg Auðunsdóttur og Sigríði Hagalín Björnsdóttur, sem báðar starfa á fréttastofu Ríkisútvarpsins, að funda hvor í sínu félaginu og senda yfirlýsinguna sameiginlega frá sér,“ segir hann.
„Sigríður Dögg hafði þá þegar tjáð sig um að það væri óskiljanlegt og alvarlegt að fréttamenn væru boðaðir í skýrslutöku og Sigríður Hagalín Björnsdóttir hafði kvöldið áður stýrt Kastljóssþætti á Ríkisútvarpinu um efnið.“
Bjarni segir að yfirlýsing félaganna hafi ekkert snúist um það sem hann var að tala og lögin séu sér kunn.
„Í fyrsta lagi hefur ekkert gerst annað en að einstaklingar hafa verið boðaðir í skýrslutöku og hafa þar réttarstöðu sakborninga. Hvaðan hafa félögin upplýsingar um að þessir fréttamenn verði í næstu viku krafðir svara um heimildamenn sína? Hefur það komi fram einhvers staðar?,“ spyr hann.
Yfirlýsingarnar frá félögunum tveimur hafi svo verið keimlík umfjöllun RÚV sem hann hafi einmitt verið að gagnrýna:
„Hver er svo sem munurinn þegar formenn beggja félaga starfa á fréttastofu Ríkisútvarpsins. Jú, það má svo sem segja að þegar fleiri úr stjórninni koma saman þá geta fleiri sjónarmið heyrst. Með Sigríði Dögg Auðunsdóttur í stjórn Blaðamannafélagsins situr til dæmis Aðalsteinn Kjartansson, einn þeirra sem lögreglan hefur boðað til skýrslutöku og hefur fengið réttarstöðu sakbornings,“ segir Bjarni.
„Og það skýtur skökku við að fréttamenn því sem næst yfirtaki fréttatíma með málflutning sinn. Áhorfendur horfa á fréttamenn taka viðtöl við fréttamenn um mikilvægi fréttamanna og þeirra kenningar um tilgang lögreglunnar með rannsókn máls - án þess að haldbær gögn styðji þær kenningar.“
Bjarni segir að fréttamenn verði að þola að vera boðaðir til yfirheyrslu:
„Meira að segja Félag fréttamanna, stéttarfélag fréttamanna á Ríkisútvarpinu og Blaðamannafélagið hljóta að sjá það. Og ef þau sjá það, er næstum öruggt að fréttastofa Ríkisútvarpsins sér það.“
