Bjarni Jónsson, eigandi Nordic Store og fyrrverandi dósent, skrifar opið bréf til Þórólfs Guðnasonar sóttvarnalæknis þar sem hann varar við hrikalegum afleiðingum þess að loka landinu fyrir ferðamönnum til lengri tíma.
Bjarni skrifar pistil um málið á vef Vísis.
„Sæll Þórólfur.
Á síðasta upplýsingafundi um Covid varpaðir þú fram eftirfarandi spurningum: Hvað eigum við að sætta okkur við að margir sýkist, hvað margir leggist inn á spítala og hve margir deyja af völdu Covid?
Ég ætla nefna nokkur dæmi sem geta hjálpað þér við að komast að svarinu.“
Bjarni nefnir að allt að 29 manns deyi árlega af völdum inflúensu sem berst reglulega til landsins. Hægt væri að koma í veg fyrir þessi dauðsföll með því að loka landinu. Þá deyi 10-20 manns árlega í umferðarslysum og 150 slasast alvarlega eða örkumlast. Hægt væri að koma í veg fyrir þessi dauðsföll og örkuml með því að banna umferð.
„Um 400 manns deyja árlega af völdum tóbaksreykinga. Við gætum komið í veg fyrir mörg þessara dauðsfalla með því að banna reykingar en kjósum að gera það ekki, teljum þessi dauðsföll ásættanleg.“
Bjarni nefnir fleiri dæmi. Þá sem deyja um aldur fram og hafa leitað sér áfengismeðferðar hjá SÁÁ. Hægt væri að banna áfengi en kosið sé að gera það ekki. Þá hafi ófáir sjómenn dáið við störf sín en af augljósum ástæðum sé sjósókn ekki bönnuð.
„Að loka landinu fyrir ferðamönnum eins og gert var 19. ágúst kemur hugsanlega í veg fyrir einhver Covid smit, jafnvel dauðsföll, en þú mátt líka, Þórólfur, hugsa um afleiðingarnar. Þúsundir missa vinnuna, allt að 10% vinnandi manna. Hundruðir missa fyrirtæki sín í gjaldþrot og tapa aleigunni. Heilsufarslegar, félagslegar og efnahagslegar afleiðingar munu hrjá allt þetta fólk, börn þeirra og fjölskyldur um langt skeið. Vonleysi, fátækt, þunglyndi, sjálfsmorð. Þessi áhrif eru rétt að byrja að verða sýnileg.“
