Bjarni Benediktsson gagnrýndi Halldóru Mogensen, þingmann Pírata, fyrir það að benda á að launahækkun forsætisráðherra verði tvöföld hækkun á taxtalaunum hjúkrunarfræðinga. Á Stundinni er greint frá því að Bjarni hafi sagt vera „leiður á“ að ræða launamál þingmanna og ráðherra á Alþingi en ráðherra eiga að hækka um 100.000 á einu bretti og er sú hækkun afturvirk til fjögurra mánaða.
Halldóra spurði Bjarna í óundirbúnum fyrirspurnum um launahækkun þingmanna sem tekur gildi næstu mánaðamót. Þá spurði Halldóra hvort það væri ekki ráð að falla frá fyrirhuguðum launahækkunum.
Bjarni svaraði að þingmenn og ráðherrar væru eftirbátar annarra þegar kæmi að launahækkunum undanfarin ár. Halldóra sagði greinilegt að Bjarni væri pirraður á að ræða launamálin. Þá bendir Stundin á að þetta sé í annað sinn sem Bjarni kveðst leiður á að ræða laun þingmanna og ráðherra. Árið 2017, þegar laun þingmanna hækkuðu strax eftir kjördag um 44%, sagði Bjarni:
„Mér finnst alveg gersamlega óþolandi að þurfa að taka umræðu um það hver kjör þingmanna eigi að vera eða ráðherra ef því er að skipta. Mér finnst rétt að um þau mál eigi að búa með lögum og fela þriðja aðila að leiða það til lykta.“
Hér má lesa úttekt Stundarinnar.
