Bjarni: „Aum og ömur­leg til­raun“ – Þor­gerður: Fór Bjarni öfugu megin fram úr rúminu?

Bjarni Bene­dikts­son fjár­mála­ráð­herra og Þor­gerður Katrín Gunnars­dóttir, þing­maður og for­maður Við­reisnar, skiptust á nokkrum vel völdum orðum í ó­undir­búnum fyrir­spurna­tíma á Al­þingi í dag.

Þor­gerður steig í pontu og spurði Bjarna að því hvort hann deildi á­hyggjum Katrínar Jakobs­dóttur for­sætis­ráð­herra um stöðu kvenna í Pól­landi. Eins og kunnugt er hafa þing­menn úr nokkrum flokkum, Við­reisn meðal annars, lagt fram þings­á­lyktunar­til­lögu um að­­gengi ein­stak­linga sem ferðast til Ís­lands að þungunar­rofi.

Systur­flokkur Sjálf­stæðis­flokksins

Þor­gerður nefndi að stjórn­laga­dóm­stóll Pól­lands hefði ný­lega komist að þeirri niður­stöðu að þungunar­rof vegna fóstur­galla stangaðist á við stjórnar­skrá landsins. Þetta hefði gerst eftir að flokks­menn Laga og rétt­lætis hefðu rýnt dóminn og komið að sínum mönnum.

Þor­gerður benti á að Lög og rétt­læti væri systur­flokkur Sjálf­stæðis­flokksins í blokk í­halds­flokka í Evrópu. Sagðist Þor­gerður gera sér grein fyrir því að málið væri við­kvæmt innan Sjálf­stæðis­flokksins þar sem átta þing­menn flokksins greiddu at­kvæði gegn þungunar­rofi og stjórnar­frum­varpi heil­brigðis­ráð­herra.

Spurði Þor­gerður hvort Bjarni væri þeirrar skoðunar að konur eigi til­neyddar að ljúka með­göngu þrátt fyrir að ljóst sé að barn muni ekki lifa það af eða tölu­verð á­hætta geti fylgt því, bæði fyrir móður og barn.

Bjarni: „Því­líkur þvættingur“

Bjarni virtist ekki mjög á­nægður með fyrir­spurn Þor­gerðar.

„Virðu­legi for­seti. Ég átta mig ekki alveg á því hvað hátt­virtur þing­maður er að fara hér. Til dæmis er vísað í það að nokkrir þing­menn Sjálf­stæðis­flokksins hafi ekki stutt frum­varp til breytinga á reglum um þessi efni. Þá skulum við spyrja okkur hvers vegna það var, um hvað at­huga­semdir þing­mannanna snerust. Snerust þær um það að hv. þing­menn vildu taka upp reglurnar sem er verið að vísa í að gildi í Pól­landi? Verið er að gefa það í skyn hér. Því­líkur þvættingur, því­líkur mál­flutningur. Það er al­ger­lega með ó­líkindum að hlusta á þetta, þetta er ein­hver ömur­legasta til­raun sem ég hef hlustað á lengi til að tengja Sjálf­stæðis­flokkinn við eitt­hvert hneykslis­mál út í Evrópu.“

Bjarni sagði að honum fyndist reglurnar í Pól­landi ekki vera til fyrir­myndar og og hann hefði á­hyggjur af stöðu kvenna vegna þess.

„Ég held hins vegar að ef við lyftum að­eins höfðinu og litum víðar í kringum okkur í heiminum myndum við finna fjöldann allan af löndum þar sem staðan er jafn slæm eða verri. Hvað hefur það með Sjálf­stæðis­flokkinn að gera og at­kvæða­greiðslu um mál heil­brigðis­ráð­herra fyrr á þessu ári? Ég skil ekkert hvað er verið að fara.“

Rödd Ís­lands mikil­væg

Þor­gerður steig aftur í pontu og virtist undrandi á svari Bjarna. „Virðu­legi for­seti. Ég held að hæst­virtur fjár­mála­ráð­herra hafi farið öfugu megin fram úr rúminu,“ sagði hún og bætti við að um ein­falda spurningu hafi verið að ræða. Viður­kenndi hún að þetta tengdist því að um systur­flokk Sjálf­stæðis­flokksins væri að ræða, þar væri til dæmis mögu­leiki fyrir flokkinn að beita sér fyrir því að réttindi kvenna væru virt víða um heim.

„Rödd Ís­lands skiptir máli, ekki síst á sviði jafn­réttis­mála. Við höfum fram til þessa haft mikið að segja og þegar við tjáum okkur um jafn­réttis­mál er hlustað. Þá skiptir máli hvaða af­stöðu for­maður stærsta flokksins, verandi í ríkis­stjórn, hefur til þessa máls. Þetta tengist auð­vitað því að af­staða formanns Sjálf­stæðis­flokksins var bara með þeim hætti. Það voru engin mál­efna­leg rök á sínum tíma að fækka vikunum úr 22 í 20, engin. Allir læknar lögðust gegn því.“

Aum og ömur­leg til­raun

Bjarni steig öðru sinni í pontu og sagði að Þor­gerði hefði ekkert gengið sér­stak­lega vel að koma að ein­faldri spurningu.

„Hún leggur lykkju á leið sína til þess að draga inn í málið alls konar ó­skylda hluti. Í fyrsta lagi þá ætla ég að segja þetta um stöðu kvenna í Pól­landi: Ég hef sömu á­hyggjur og for­sætis­ráð­herra af þessari breytingu. Við getum rætt það. En hátt­virtur þing­maður er að setja hér á dag­skrá allan and­skotann annan sem hefur ekkert með þetta mál að gera […] Virðu­legi for­seti. Ég biðst for­láts en það hefur ekkert með málið að gera hvort Sjálf­stæðis­flokkurinn er í flokka­sam­starfi á vett­vangi Evrópu­sam­vinnu með ein­hverjum flokkum og það þýði að hann fylgi sömu stefnu og þeir í öllum mála­flokknum. Þetta er bara ekki boð­leg nálgun. Þetta er bara aum og ömur­leg til­raun til að koma höggi á Sjálf­stæðis­flokkinn út af ein­hverju sem er að gerast úti í Pól­landi.“