Birta stað­reyndir um kjara­deiluna – „Vissir þú að...“ – Sjáðu launahækkanirnar sem stóðu Eflingu til boða

Kjara­deila Eflingar og Sam­taka at­vinnu­lífsins er enn í hörðum hnút og hefur SA boðað verk­bann í næstu viku. Efling til­kynnti ekki um næstu runu verk­falla með lög­mætum hætti og hefjast þau því ekki í næstu viku.

Sól­veig Anna Jóns­dóttir, for­maður Eflingar, sagði í dag að það hafi verið viljandi gert þar sem verk­föllin væru ó­þarfi ef verk­bannið tekur gildi. Stjórn Eflingar mun funda um stöðuna í kvöld.

Mikil leynd hefur verið um við­ræðurnar og aðilar bundnir trúnaði en þó hefur lengi verið gengið ut frá því að Eflingar­fé­lögum hefur verið boðið sömu launa­hækkanir og aðrir á al­mennum vinnu­markaði en SA hefur samið við næstum 90% launa­manna.

SA birti hins vegar stað­reyndir um kjara­deiluna á heima­síðu sinni í dag sem gefa smá inn­sýn inn í deiluna:

„Vissir þú að ....

.. nú þegar hefur verið gengið frá kjara­­samningum fyrir um 90% allra á al­­mennum vinnu­­markaði?

... Eflingu hefur staðið og stendur til boða sam­bæri­­legur samningur og annað verka­­fólk um land allt hefur sam­þykkt með 86% at­­kvæða?

... Sam­tök at­vinnu­lífsins hafa frá upp­­hafi verið reiðu­búin að að­laga kjara­­samning verka­­fólks á lands­byggðinni að á­herslum Eflingar innan þess ramma sem þar var settur?

... í þeim samningi sem SA lögðu til grund­vallar við­ræðna við Eflingu hækka grunn­­laun á mánuði um 35.000-52.258?

... þeir kjara­­samningar sem hafa verið undir­­­ritaðir og rætt er um við Eflingu gilda í ríf­­lega 11 mánuði frá deginum í dag?

... Efling hafnaði að leggja í dóm fé­lags­manna sinna miðlunar­til­lögu sem þýðir sam­s­­konar launa­hækkanir og annað verka­­fólk á landinu hefur fengið og með aftur­­­virkum launa­hækkunum til 1. nóvember 2022?

... Efling hafnaði því að taka þátt í við­ræðum með öðrum sam­bæri­­legum stéttar­­fé­lögum og lagði fram kröfur sínar fjórum mánuðum síðar?
... Efling hefur á engum tíma­­punkti hvikað frá þeirri kröfu að starfs­­fólk á fé­lags­­svæði sínu fái hærri laun en ein­stak­lingur í sama starfi hringinn í kringum um landið?

... ef gengið yrði að kröfum Eflingar væru laun verka­­fólks hærri í Kópa­vogi en í Hafnar­­firði og að sama skapi hærri í Hvera­­gerði en á Sel­­fossi?

... Efling hefur hvatt at­vinnu­rek­endur og starfs­­fólk til að brjóta vinnu­lög­­gjöfina og hótað að standa fyrir mót­­mælum hjá þeim at­vinnu­rek­endum sem hlíta lög­­mætu verk­banni?“