Morgunblaðið birtir í dag nöfn allra þeirra Íslendinga sem finna má í Zhenhua-gagnalekanum svokallaða. Um er að ræða lista með 411 nöfnum en líkur eru á að nöfnin séu allt að tíu sinnum fleiri.
Óvíst er hvaða tilgangi nafnalistinn nákvæmlega þjónar en látið hefur verið að því liggja að Kínverjar noti hann til að þefa uppi hneykslismál um allan heim. Þetta kom fram í frétt ABC í Ástralíu sem RÚV fjallaði um á dögunum. Hafa samstarfsaðilar fyrirtækisins meðal annars verið sagðar stofnanir á sviði varnarmála og leyniþjónustu.
Í frétt Morgunblaðsins í dag kemur fram að á listanum séu nöfn áhrifafólks í stjórnmálum, viðskiptum, og stjórnkerfi. Þá má finna upplýsingar um fæðingardag, heimilisfang og hjúskaparstöðu auk þess sem upplýsingum af samfélagsmiðlum viðkomandi hefur verið safnað saman.
Meðal þeirra nafna sem Morgunblaðið birtir eru til dæmis: Auðunn Atlason, Ástráður Haraldsson, Bergvin Oddsson, Birkir Kristinsson, Geir H. Haarde, Halldóra Mogensen, Jón H.B. Snorrason, Katrín Júlíusdóttir, Ríkharður Daðason og Óttarr Proppé.
