„Með ósannindi og hálfsannleik að vopni er reynt að sá efasemdafræjum í huga fólks,“ segir Birgir Hrafnsson, gítarleikari og áhugamaður um ábyrga umræðu.
Birgir skrifar grein í Fréttablaðið í dag þar sem hann lætur Frosta Sigurjónsson, fyrrverandi þingmann Framsóknarflokksins, fá það óþvegið. Frosti hefur verið áberandi í gagnrýni sinni á heilbrigðisyfirvöld undanfarnar vikur vegna Covid-19 faraldursins.
„Það vakti eftirtekt þegar fyrrum alþingismaður birti pistil á fésbók sinni, þar sem hann lýsti almennum efasemdum um aðgerðir og ákvarðanir sóttvarnalæknis og annarra íslenskra yfirvalda í tengslum við COVID-19 veiruna. Hann bætti um betur og í viðtali í útvarpsþætti nokkrum hélt hann því fram að „útlendingum frá hættusvæðum hefði verið hleypt óskimuðum inn í landið til þess að koma smiti inn í samfélagið“ og virtist þar með ekki hafa fylgst með fréttaflutningi af skíðaglöðum Íslendingum í Ölpunum.“
Þó Birgir nafngreinir Frosta ekki í pistlinum er augljóst um hvern er verið að tala. Hann minnist einnig á opið bréf þingmannsins fyrrverandi til Katrínar Jakobsdóttur forsætisráðherra, þar sem Frosti sagði meðal annars:
„Þú ert vonandi mjög hugsi, enda hvílir ábyrgðin nú á þínum herðum og ríkisstjórnarinnar. Það er ekki hægt að vísa ábyrgð á sóttvarnalækni, nú þegar öllum má vera ljóst að aðferð hans er röng og getur leitt til stórtjóns.“
Birgir segir að ofangreind atburðarás lýsi þekktu áróðursbragði.
„Með ósannindi og hálfsannleik að vopni er reynt að sá efasemdafræjum í huga fólks. Þrátt fyrir að margir láti sér fátt um finnast (sem betur fer), liggur óhróðurinn eftir eins og tyggjóklessa, sem erfitt getur reynst að hreinsa upp að fullu, eins og jafnan er um tyggjóklessur.“
Birgir segir að bragðið hafi í raun heppnast því yfirvöld hefðu þurft að sverja áburðinn af sér.
„Sjaldan er ein báran stök og þingflokkur stjórnmálaflokks nokkurs birti heilsíðu auglýsingu af svipuðum (eða sama?) meiði í dagblöðum laugardaginn 21. mars. Þrátt fyrir öllu settlegri tón, fer ekki á milli mála að boðskapurinn er sama eðlis og megum við líklega búast við meiru af slíku á næstunni. Á óvissutímum sem þessum ræður úrslitum að allir leggist á eitt. Til viðbótar við dyggðir eins og samheldni, yfirvegun, sannleiksást og náungakærleik, er einnig mikilvægt að „mæla þarft eða þegja“.
