Birgir Örn með mikilvæg skilaboð: Ef við höfum grun eigum við að láta vita í 112

„Sam­fé­lagið er halt. Þegar við ein­blínum svona mikið á meiðslin á einum út­limi sam­fé­lagsins er hætta á á­fram­haldandi stoð­kerfis­vanda­málum þó út­limurinn læknist. Ég hef sjálfur miklar á­hyggjur af þeim vanda­málum.“

Svona hefst pistill eftr lög­reglu­manninn Birgi Örn Guð­jóns­son sem hann birti á Face­book-síðu sinni fyrr í dag. Birgir hefur að undan­förnu sinnt starfi sem snýr að því að skoða hvernig lög­reglan á höfuð­borgar­svæðinu getur á sem bestan og skil­virkastan máta komið að for­vörnum.

Birgir segir það vitað mál að einn af fylgi­kvillum CO­VID-19 sé á­kveðinn efna­hags­vandi. Til­efni pistilsins er þó ekki efna­hags­vandi heldur óttast Birgir að við séum ekki með puttann jafn mikið á fé­lags­legu fylgi­kvillunum.

„Hvaða á­hrif hefur þetta á­stand t.d. á börnin okkar og ung­mennin? Aukinn ótti, kvíði, streita. Þar á ofan er jafn­vel enginn skóli, ekkert fé­lags­starf, engar í­þróttir og minna taum­hald. Við þetta á­stand eykst hætta á á­kveðinni á­hættu­hegðun og jafn­vel sjálf­lækningu við slæmri líðan með hug­breytandi efnum. Við verðum að vera vakandi fyrir þessari hættu. Að sofna núna eða ein­blína einungis á meiðslin á einum út­limi sam­fé­lagsins getur haft slæmar og hættu­legar af­leiðingar á restina af líkamanum.“

Birgir Örn talar einnig um heimilis­of­beldi og auknar líkur á því nú þegar fólk er í auknum mæli heima. Fyrir suma sé heimilið nefni­lega ekki griða­staður, heldur hættu­legasti og mest ógn­vekjandi staður sem til er.

„Nú eru ytri að­stæður þannig að fólk er meira heima við og er jafn­vel knúið til að vera þar í sótt­kví eða til að vinna. Fyrir suma, oftar konur og börn, getur slík staða verið ó­lýsan­leg mar­tröð. Að vera lokaður inni í búri með sínum mesta ógn­valdi. Slíkt getur haft miklar og jafn­vel ó­aftur­kræfar af­leiðingar. Sér­stak­lega á börnin sem verða fyrir eða verða vitni af heimilis­of­beldi,“ segir Birgir sem biðlar til fólks að láta vita ef grunur vaknar um of­beldi af ein­hverju tagi.
„Eins og staðan er getum við lítið annað en biðlað til okkar sem sam­fé­lags að hugsa hvort um annað. Ef við höfum grun um heimilis­of­beldi eða van­rækslu eigum við að láta vita í 112. Núna er aukin hætta og það er sam­fé­lags­leg skylda okkar að grípa inn í.“

Birgir bendir á að Kvenna­at­hvarfið sé opið og til­búið að að­stoða þær konur sem þurfa. Hann bendir einnig á Bjarka­hlíð sem er mið­stöð fyrir þol­endur of­beldis og á Akur­eyri er sams­konar úr­ræði sem heitir Bjarma­hlíð. Birgir endar pistilinn á þessum orðum:

„Ekki bíða með að hafa sam­band. Við erum öll al­manna­varnir.“