Birgir læknir fellir sinn dóm: „Heim­sóknar­bannið hefur al­gjör­lega brugðist“

„Meðal margra við­mælenda minna er tæp­lega ní­ræður karl­maður sem kom dag­lega til að hitta heila­sjúka mál­stola eigin­konu, lífs­föru­naut til um 70 ára. Annar eigin­maður hafði um langan tíma tekið virkan þátt í um­önnun konu sinnar. Báðum var nánast sparkað burtu.“

Þetta segir Birgir Guð­jóns­son læknir í að­sendri grein í Frétta­blaðinu í dag. Birgir hefur að undan­förnu gagn­rýnt heim­sóknar­bann sem í gildi er á hjúkrunar- og dvalar­heimilum landsins vegna CO­VID-19. Sjálfur er Birgir að­standandi en hann á konu sem er Alz­heimer­sjúk­lingur og bundin hjóla­stól.

Birgir heldur um­fjöllun sinni á­fram í dag þar sem hann fer yfir þær að­gerðir sem gripið hefur verið til undan­farnar vikur og mánuði. Birgir segir meðal annars:

„Ein­hver van­hugsaðasta að­gerðin verður að telja fyrir­vara­laust harka­legt heim­sóknar­bann ættingja á hjúkrunar­heimili 6. mars. Engar aðrar var­úðar­ráð­stafanir voru kynntar. Þar dvelja veikustu ein­staklingar þjóð­fé­lagsins. Enginn mögu­leiki var fyrir ættingja að kynna sjúk­lingum bannið, kveðja og undir­búa mögu­legar sam­skipta­leiðir. Tak­markaðar heim­sóknir hefðu verið sjálf­sagðar.“

Birgir rifjar upp að hann hafi bent á veik­leika þessa fyrir­komu­lags með bréfi til Em­bættis land­læknis þann 7. mars síðast­liðinn og aftur 10. mars. Hann hafi bent á að smit gætu borist með öðrum og stakk upp á lausn.

„Þessu var fylgt eftir með blaða­grein 11. mars. Þetta var al­gjör­lega virt að vettugi. Tugir til hundrað veik­burða ein­staklingar vítt og breitt um landið sem jafn­vel að hluta hafði verið sinnt af ættingjum voru settir í fé­lags­lega ein­angrun. Brosandi starfs­fólk, fagur­yrði og iPadar sem virðast vera orðnir að helgi­tákni, gera ekkert fyrir jafn­vel sjón- og heyrnar­skerta ein­stak­linga með dvínandi minni sem gagnast ekki einu sinni sími. Þeir eru sviptir því eina sem skiptir þá máli, sam­skiptum við ættingja sem þeir enn þekkja.“

Birgir kveðst ekki vera eini að­standandinn í þessari stöðu og bendir hann á tvö dæmi máli sínu til stuðnings sem vísað er til fremst í þessari grein.

Birgir segir einnig að for­stjóri hjúkrunar­heimilis hafi rök­stutt þessar að­gerðir fjálg­lega og gefið í skyn að þær kæmu í veg fyrir smit inn á heimilin og tryggðu öryggi. „Fyrsti smit­berinn inn á hjúkrunar­heimilið er síðan hans eigin starfs­maður. Á Landa­koti greindust margir starfs­menn með Co­vid-19 og margir sjúk­lingar sýktust. Á Vest­fjörðum greindust nokkrir starfs­menn á hjúkrunar­heimili með Co­vid-19 og komu upp al­var­leg veikindi á hjúkrunar­heimilinu og leiddu til manns­láts. Smit hefur komið að a.m.k. þremur öðrum stofnunum með heim­sóknar­bann. Þessar smitanir komu ekki frá ættingjum.“

Birgir endar grein sína á að vitna í orð tals­manna stofnana sem hvetja til að ekki sé leitað að söku­dólgi. Veiran fari sínar leiðir og „smýgur um allt“ eins og hann kemst að orði.
„Ég tek undir það. Það mátti vera aug­ljóst að þetta gæti gerst. Heim­sóknar­bannið hefur al­ger­lega brugðist. Engar upp­lýsingar liggja fyrir um tíma­setningu á tak­mörkun heim­sóknar­banns en það gæti orðið á þriðja mánuð. Hver mun muna eftir hverjum?“