Gregor Sagetch, bílstjóri hjá Kynnisferðum, var meðal Eflingarfólks sem mætti á baráttufund Eflingar í Iðnó í hádeginu í dag. Hann er ekki í verkfalli en kveðst styðja aðgerðir Eflingar í hvívetna og furðar sig á því að Samtök atvinnulífsins gangi svo langt með aðgerðum sínum í stað þess að hækka laun hinna lægst launuðu.
Þetta segir Sagetech í samtali við Fréttablaðið.
„Ég hef fylgst með öllum fréttum frá því að baráttan hófst. Ég er í Eflingu og mér finnst það sjálfsagt að hinir lægst launuðu fá hærri laun, ekki á forsendum SA,“ segir Gregor í samtali við Fréttablaðið.
„Mér finnst persónulega að það hljóti að vera þannig að það skipti ekki eins miklu máli fyrir þá hærra launuðu að hinir lægst launuðu fái aðeins hærri laun, því það breytir raunverulega svo miklu fyrir þá.“
Aðspurður hvað sér finnist um ákvörðun SA um að grípa til verkbanns frá og með 2. mars, þar sem Eflingarfólk verður launalaust fyrir vikið, segir Gregor:
„Miðað við það sem ég hef séð finnst mér kröfur og aðgerðir Eflingar mjög hóflegar og réttlætanlegar. Þetta snýst um lífskjör fólk og mér finnst hegðun SA þeim ekki sæmandi og það er mikil vanvirðing gagnvart okkur að grípa til þessara aðgerða og þess vegna styð ég Eflingu.“
Gregor segist spurður telja það líta þannig út að SA vilji ekki semja við Eflingu því þar séu á ferðinni þeir lægst launuðu í íslensku samfélagi.
„Það lítur þannig út. Ég get ekki séð hvernig aðeins hærri laun fyrir okkur skipta Samtök atvinnulífsins svona miklu máli, því nú munu þau tapa miklu meiri fjármunum á því að banna okkur að vinna, sem mun auðvitað kosta fyrirtækin gríðarlega mikla fjármuni.“
Hefurðu áhyggjur af því að missa launin þín í verkbanni?
„Ég þoli það alveg að vinna ekki í nokkra daga eða svo. En mér finnst það svo furðulegt að þeir séu frekar tilbúnir til þess að missa svona miklar tekjur í staðinn fyrir að borga okkur bara örlítið hærri laun.“
