Birgir Örn Guðjónsson, betur þekktur sem Biggi lögga, hefur hafið undirskriftasöfnun á vefsíðunni Ísland.is gegn því að malbikunarstöðin Höfða verði flutt á Álfhellu í Hafnarfirði. Nú þegar hafa um 650 manns skrifað undir listann. Frá þessu greinir hann á Facebook og segir: Nú er komið að okkur kæru Hafnfirðingar. Eftir umræðuna sem skapaðist um ætlun Reykjavíkurborgar um að setja malbikunarstöð í þeirra eigu í bakgarðinn hjá okkur skapaðist mikil umræða og ósk um undirskriftalista. Hann er núna klár og nú er undir okkur komið að sýna andstöðu okkar við þessar áætlanir.
Í greinargerð með undirskriftalistanum segir að Reykjavíkurborg ætli sér með „undirförulli leið“ að koma fyrir stóriðju með meðfylgjandi mengun „í bakgarðinum á einu mest vaxandi íbúðahverfi bæjarins.“
„Borgin hefur fengið neikvæð svör við því að fá að setja upp malbikunarstöðina Höfða á þessu svæði en er nú búin að kaupa lóð af annarri malbikunarstöð og ætla að ganga þar inn með sína stöð. Mikil óánægja var meðal íbúa með uppsetningu þeirrar stöðvar á sínum tíma. Til stóð að borgin myndi setja Höfða á iðnaðarsvæði innan sinna borgarmarka en nú hefur verið ákveðið að koma henni frekar til Hafnarfjarðar í skjóli nætur.“
Þeir sem undir listann skrifa mótmæla þessu og vilja að borgin hætti við að flytja stöðina í Hafnarfjörð og finni henni stað í Reykjavík.
„Íbúar Hafnarfjarðar geta ekki sætt sig við að Reykjavíkurborg ætli að flytja sína eigin malbikunarstöð í garðinn á einu stærsta íbúðahverfi bæjarins. Til stóð að borgin myndi flytja stöðina á sitt eigið iðnaðarsvæði en hætt var við það, m.a. vegna mótmæla íbúa í næsta nágrenni við það. Reykjavíkurborg hafði ekki fengið jákvæð svör frá Hafnarfjarðarbæ um að fá að flytja stöðina þangað en nú ætlar hún bakdyramegin inn með því að kaupa land af annarri malbikunarstöð sem var fyrir með leyfi. Mikil óánægja var á sínum tíma með uppsetningu þeirrar stöðvar en íbúum var tjáð að það væri færanleg stöð sem auðvelt væri að taka niður. Það eru ekki boðleg vinnubrögð og lýsir algjörum yfirgangi að ætla að setja upp mengandi iðnað í bakgarðinum hjá nágrönnum sínum í næsta sveitarfélagi. Það leiðir einnig af sér aukna umferð og mengun að flyta malbikið í gegnum þrjú önnur sveitarfélög til að koma því til Reykjavíkur.“
