Þriðja tilvik þess að maður berar kynfæri sín við skólakrakka í Seljaskóla í Seljahverfi á einungis tveimur mánuðum átti sér stað í síðustu viku. Lögregla hefur mann í haldi vegna málsins.
Segir Ævar Pálmi Pálmason, aðstoðaryfirlögregluþjónn, í samtali við mbl.is að viðkomandi neiti sök. Hann segist ekki geta tjáð sig um hvort lögreglan telji að sami maður hafi berað sig í þrígang, eða hvort að um sitthvor tilvikin sé að ræða.
Ævar segir að lögreglan rannsaki þó hvort tilvikin tengist. Lögreglan hafi hinsvegar úr litlu að moða vegna þeirra tilvika sem urðu í janúar. Einungis væri lögreglan með lýsingar frá börnum á milli handanna og þá hefðu atvikin átt sér stað í myrkri.
„Lögreglan var með aukinn viðbúnað þarna næstu dagana á eftir og vikurnar í rauninni, bæði í formi aukins eftirlits á svæðinu og svo vorum bara bæði með merkta bíla og ómerkta bíla. Ég veit að skólinn sjálfur jók við eftirlit og svona viðveru á skólalóðinni á skólatíma,“ segir Ævar.
