Bensínverð og verð á dísilolíu er komið yfir 300 krónur eftir hækkanir í morgun. Bensínverð hefur hækkað síðustu vikurnar í kjölfar innrásar Rússa í Úkraínu og hækkandi heimsmarkaðsverðs.
Joe Biden forseti Bandaríkjanna hélt sjónvarpsræðu í gær þar sem hann tilkynnti að Bandaríkin myndi hætta að kaupa eldsneyti frá Rússlandi. Talið er líklegt að það hafi haft áhrif á heimsverðið en þá hafa stór olíufyrirtæki eins og Shell einnig hætt að eiga í viðskiptum við Rússa.
Á bensínstöðvum N1 kostar lítrinn af bensíni á bilinu 300,9 krónur til 303,9 krónur. Eina Olís stöðin sem nær 300 krónunum er Olís í Hrauneyjum, en þar kostar lítrinn 302,8 krónur.
Lægst er verðið hjá Costco í Garðabæ en þar kostar bensínlítrinn nú 255,9 krónur. Þar þarf fólk áskriftarkort til að versla sér bensín. Algengasta verð á bensíni á landinu í dag er í kringum 298 krónur.
