Banaslys varð á Höfðabakka í Reykjavík í nótt en þar var ekið á gangandi vegfaranda. Lögreglan greinir frá þessu í tilkynningu en lögreglan og rannsóknarnefnd samgönguslysa rannsaka tildrög slyssins.
Tilkynning um slysið barst um hálfeittleytið í nótt, en bifreið á leið norður Höfðabakka, nálægt Árbæjarsafni, hafnaði á vegfarandanum, sem var karlmaður á fimmtugsaldri.
Hann var fluttur á Landspítalann, en lést þar síðar um nóttina. Lokað var fyrir umferð um Höfðabakka, á milli Bæjarháls og Stekkjarbakka, á meðan unnið var á vettvangi.
