Lilja Björg Randversdóttir, unnusta Daníels Eiríkssonar, sem lést 2. apríl síðastliðinn, kveðst ekki trúa því sem lögreglan segir um andlátið.
Daníel lést á Landspítalanum af áverkum sem hann hlaut í líkamsárás fyrir utan heimili sitt þann á föstudaginn langa. Hann var aðeins þrítugur að aldri þegar hann lést.
Ekki um slys að ræða
„Í þessum heimi er ekkert svona óvart slys,“ segir Lilja í viðtali við DV. „Það sem lögreglan segir mér að hafi gerst stenst bara engan veginn.“
Karlmaður sem hefur stöðu sakbornings í málinu var úrskurðaður í fjögurra vikna farbann í byrjun apríl, sem gildir til 7. maí. Ekki var gerð krafa um áframhaldandi gæsluvarðhald og því var maðurinn látinn laus.
Maðurinn er sakaður um að hafa keyrt á Daníel en hann heldur því fram að um slys hafi verið að ræða. Lilja segir frásögnina ekki standast skoðun.
„Ég veit hvar hann lá og það stenst engan veginn að um slys hafi verið að ræða. Ef hann Danni hefur hangið utan á bílnum þessa stuttu vegalengd á svæðinu þá hefði hann klárlega ekki fengið þessa gríðarlegu miklu höfuðáverka og viðbeinsbrotnað.“
Djammar og mætir í World Class
Aðrir aðstandendur Daníels segja manninn sem keyrði bílinn ekki sýna neina iðrun.
„Ég myndi halda að maður sem hefur orðið valdur að dauða annars manns ætti að hafa hægt um sig í langan tíma á eftir,“ segir Sverrir Einar Eiríksson, eldri bróðir Daníels heitins.
„Þessi maður sýnir enga iðrun, það sást til hans á djamminu og í World Class um leið og hann var laus úr gæsluvarðhaldi. Ekkert í framferði hans ber þess merki að hann hafi orðið manni að bana og sé eyðilagður út af því,“ segir Guðný Sigríður Eiríksdóttir, systir Daníels.
