„Enginn á að missa heimili sitt vegna aðstæðna og aðgerða sem þeir hafa ekkert með að gera og engar varnir gegn. Allt skal gert til að hindra slíkar hörmungar,“ segir Baldur Borgþórsson, varaborgarfulltrúi Miðflokksins, í aðsendri grein á vef Vísis.
Baldur skrifar þar um stöðu mála í efnahagslífinu vegna COVID-19-faraldursins og segir hann að þúsundir fjölskyldna sjái nú fram á að missa heimili sín komi ekki til aðgerða af hálfu ríkisstjórnar landsins.
„Hjá sumum er tekjufallið verulegt hjá öðrum algjört,“ segir Baldur sem veltir fyrir sér hvað er til ráða.
„Eigum við aftur að horfa upp á þúsundir fjölskyldna missa heimili sín að ósekju? Svarið er Nei. Þegar svona er komið þarf að hugsa út fyrir kassann og finna lausnir,“ segir Baldur sem stingur upp á því að lánastofnunum verði gert skylt að frysta lán og skuldbindingar þeirra sem hafa misst getuna til að standa undir slíku.
„Frysting felur í sér að engir vextir safnast, enginn kostnaður. Lán og skuldbindingar halda krónutölu sinni. Viðkomandi lánastofnanir fá á móti núll vexti hjá SÍ fyrir samsvarandi upphæð og fryst er. Sömu aðferðafræði mætti síðan beita víðar,“ segir hann og nefnir að sveitarfélög gætu boðið upp á frystingu fasteignagjalda með sama hætti. Þá væri hægt að beita sömu aðferðafræði vegna þeirra sem eru á leigumarkaði.
„Undirritaður gefur sig ekki út fyrir að vera sérmenntaður í fjármálafræðum en hefur þó fullvissu fyrir því að aðgerðir sem þessar eru sannarlega framkvæmanlegar. Allt sem þarf er vilji. Eitt er ljóst. Ekkert okkar vill horfa upp á fólk og fjölskyldur missa heimili sín og býli aftur. Aldrei aftur.“
