Baldur Þórhallsson, prófessor við stjórnmálafræðideild Háskóla Íslands, á ekki von á því að Katrín Jakobsdóttir, formaður VG og Svandís Svavarsdóttir heilbrigðisráðherra muni slíta ríkisstjórnarsamstarfinu vegna máls Bjarna Benediktssonar fjármálaráðherra.
Baldur stakk niður penna á Facebook-síðu sinni í morgun þar sem hann velti upp þeirri spurningu hvenær ráðherra segir af sér og hvenær ekki.
„Mestu máli skiptir afstaða forystufólks og stofnana flokks ráðherra. Þetta var raunin þegar Sigmundur Davíð og Albert sögðu af sér. Einnig getur afstaða grasrótar flokks skipt miklu eins og í máli Guðmundar Árna. Skoðun samstarfsflokka í ríkisstjórn getur líka leitt til afsagnar eins og í máli Sigríðar þegar VG krafðist afsagnar hennar. Eftirfylgni fjölmiðla og lögreglurannsókn í máli Hönnu Birnu leiddu aftur á móti til afsagnar hennar,“ segir Baldur og bætir við að krafa stjórnarandstöðu um afsögn ráðherra skipti sjaldnast máli þó að hún sé fyrsta skrefið í umræðum um hugsanlega afsögn.
Þá bætir hann við að ráðherrar segi heldur ekki af sér þó andstæðingar þeirra kalli eftir afsögn á Twitter.
„Hvað þá með afsagnir ráðherra Sjálfstæðisflokksins? Forystufólk, stofnanir og grasrót Sjálfstæðisflokksins hafa sýnt mikla þolinmæði gagnvart ráðherrunum flokksins og kalla sjaldnast eftir afsögn þeirra. Það hefur ekki breyst. Þá er líka mikilvægt að halda til haga að sú hefð hefur myndast hér á landi að forsætisráðherra og flokkar skipta sér sjaldnast af ráðherraskipan samstarfsflokka sinna í ríkisstjórn. Þeir standa með fáeinum undantekningum ávalt að baki ráðherrum stjórnarinnar. Í raun má segja að almennt sé litið á annað sem kröfu um stjórnarslit.“
Baldur segir að almennt talið muni mál Bjarna lúta ofangreindum lögmálum og þá megi bæta við að Bjarni virðist almennt njóta trausts meðal Sjálfstæðismanna. Hann segir að Bjarni sé líklega í sterkari stöðu innan flokksins í dag en oft áður.
„Bjarni hefur líka margoft sýnt að enginn stjórnmálamaður á landinu er betri að koma sér út úr vandræðum.“
Baldur bendir svo á að traust og gott samstarf virðist vera milli forystufólks ríkisstjórnarinnar. Katrín Jakobsdóttir forsætisráðherra og Svandís Svavarsdóttir heilbrigðisráðherra séu miklir reynsluboltar í pólitíkinni og þeim skriki ekki fótur þrátt fyrir ágjöf.
„Stöðugleikinn í stjórnmálum sem forsætisráðherra talar svo oft um snýst um að standa af sér brotsjó þó að það þýði að hún og VG fái skömm í hattinn (eins og t.d. í máli Kristjáns Þórs og Samherja). Katrín og Svandís munu ekki slíta ríkisstjórnarsamstarfinu vegna máls Bjarna. Björt framtíð fór flatt á því að slíta stjórnarsamstarfinu á sínum tíma. Katrín myndaði þessa ríkisstjórn til þess að þannig mál myndu ekki endurtaka sig. - Svo getur fólk haft ólíkar skoðanir á þessum hefðum og vinnubrögðum.“
