Þröstur Jónsson, oddviti Miðflokksins í Múlaþingi, segir að COVID-19 sé ekkert annað en slæm pest sem nýtir sér D-vítamínskort. Þröstur lét þessi ummæli falla á Facebook-síðu sinni en Viljinn, fréttavefur Björns Inga Hrafnssonar, greindi fyrst frá þessu.
Björn Ingi deildi frétt Viljans á Facebook í gærkvöldi og sagði við það tilefni: „Trump er víða. Til dæmis á Austurlandi.“
Þröstur er rafmagnsverkfræðingur að mennt og hefur hann farið nokkuð mikinn í umræðu um COVID-19 faraldurinn á Facebook-síðu sinni að undanförnu. Í færslu sinni sagði hann að heimsbyggðin öll hefði í upphafi tekið þessu sem alvarlegri farsótt.
Hann deilir færslu frá samtökum sem kallast World Doctors Alliance og segir að til að byrja með hafi fáir tekið mark á þeim. „Í október bauluðun við á þessi samtök. Í dag er að koma betur og betur í ljós að þau fara með rétt mál. Fjöldi radda um allan heim taka undir það.“
Það skal strax tekið fram að umrædd samtök, World Doctors Alliance, eru alræmd fyrir að dreifa falsfréttum um faraldurinn eins og sést í þessari staðreyndavakt sem fréttastofa AFP hefur sett upp.
„Þetta er slæm pest sem nýtir sér D-vítamín skort [sjá rannsóknaniðurstöður frá Singapúr] Lyf svo sem Ivermectin og jafnvel Hydroxicloricen gera pestina að engu. Gallinn er bara sá að stjórnvöld/World Economy Forum og WHO halda þessum lyfjum frá okkur til að viðhalda skelfingu og eyðileggja samfélög okkar, svo framkvæma megi hið ílla Global Reset [sjá vef WEF],“ segir Þröstur.
Hann gagnrýnir einnig að heimsbyggðin sé ekki frædd um áhrif D-vítamínskorts og segir að Lyfjastofnun hafi verið með hræðsluáróður í gangi gegn lyfinu Ivermectin. Lyfjastofnun hefur varað við notkun á lyfinu þar sem niðurstaða um mat á ávinningi og áhættu liggur ekki fyrir.
„Nauðsynlegt er að endanlegar niðurstöður úr klínískum rannsóknum liggi fyrir áður en hægt er að fullyrða um öryggi lyfsins og verkun þess sem meðferð við eða forvörn gegn COVID-19,“ segir á vef Lyfjastofnunar. Þröstur gefur lítið fyrir þetta og kallar veiruna meðal annars „Kínavírusinn“. „Þetta er ekki pandemic. Þetta er satanic planademic,“ segir hann.
