Bæði innlendir og erlendir, hæfir fjárfestar sýndu útboði á sölu ríkisins á hlut sínum í Íslandsbanka áhuga. Þetta kemur fram í tilkynningu frá Íslandsbanka um niðurstöðu söluferlis á hlut ríkissjóðs í Íslandsbanka.
Eins og fram hefur komið heimilaði Bjarni Benediktsson, fjármálaráðherra, Bankasýslu ríkisins að selja hluti ríkissjóðs í Íslandsbanka í nokkrum skrefum.
Í tilkynningunni segir að veruleg umfram eftirspurn hafi verið eftir hlut ríkisins í Íslandsbanka sem auglýstur var til sölu síðdegis í gær. Það hafi veirð hæfir innlendir og erlendir fjárfestar, sem hafi haft mikinn áhuga á hlutnum.
Þar kemur fram að seld hafi verið 22,5 prósent af útistandandi hlutafé Íslandsbanka sem jafngildir 450 milljón hlutum í bankanum. Söluverð var 117 krónur á hlut og nam söluvirði hlutarins því 52,65 milljörðum króna, en uppgjör viðskiptanna fer fram 28. mars.
Þá segir í tilkynningunni að Ríkissjóður Íslands muni eiga 42,5 prósent af útistandandi hlutum í Íslandsbanka að viðskiptunum loknum. Á síðasta ári seldi ríkið um 35 prósenta hlut sinn í Íslandsbanka, fyrir 55 milljarða króna. Ríkið átti eftir það enn um 65 prósenta hlut í bankanum.
