Sólveig Anna Jónsdóttir, formaður Eflingar, hjólar í Friðrik Jónsson, formann BHM í Facebook færslu. Tilefnið er Facebook færsla hins síðarnefnda.
Þar segir Friðrik að yfirvofandi hópuppsögn allra starfsmanna Eflingar vekji hjá sér óhug. „Hér á greinilega að losa sig við „óæskilega starfsmenn“. Vissulega er það svo að ef starfsmenn t.d. í félagspólitísku umhverfi vinna beinlínis gegn lýðræðislega kjörinni forystu að þá verður eitthvað undan að láta. Hér er hins vegar beitt öðrum rökum sem hver um sig vekja upp enn frekari spurningar,“ segir Friðrik.
Sólveig segir hann ráðast að sér með aðdróttunum um að annarlegur tilgangur ráði för í ákvörðun stjórnar um fyrirhugaðar skipulagsbreytingar á starfsemi skrifstofu Eflingar.
„Hann líkt og Drífa Snædal, forseti ASÍ, vill leggja sitt af mörkum til að grafa undan lýðræðislega kjörinni forystu Eflingar og þeim ákvörðunum sem teknar eru á vettvangi stjórnar félagsins,“ skrifar Sólveig.
„Hann, líkt og Drífa, ber enga virðingu fyrir ákvörðunarrétti verka og láglaunfólks yfir eigin félagi, hvað þá getu okkar til að taka mikilvægar ákvarðanir byggðar á málefnalegum forsendum um það hvað best er fyrir félagið okkar.
Hann, líkt og hún, getur ekki viðurkennt að Efling er eign félagsfólks, sem kýs (nú er sannarlega virkt lýðræði í félaginu, sem var undir stjórn sömu klíkunnar í 18 ár áður en ég og B-listi sigruðum vorið 2018 með yfirburðum í fyrstu kosningum félagsins frá því að það var stofnað) úr röðum félaga sinna þau sem stýra skulu félaginu og leiða þar með ákvarðanatöku um stefnu og stjórn. Hann álítur sig svo yfir mig og félaga mína hafinn að hann hljóti að geta lagt mat á hugmyndir okkar, stefnu og sýn, án þess að hann hafi þó nokkra einustu innsýn í málið. Stéttahrokinn er yfirgengilegur. Báðum þessum "verkalýðsleiðtogum" til skammar.“
