Óhætt er að segja að auglýsing Sveins Rúnars Sigurðssonar, læknis og lagahöfundar, hafi vakið mikla athygli um helgina.
Um var að ræða auglýsingu vegna íbúðar sem Sveinn og eiginkona hans auglýstu til leigu í Facebook-hópnum Leiga.
Um var að ræða gullfallega þriggja herbergja íbúð á Langholtsveginum í hjarta Reykjavíkur. Það sem vakti einna mesta athygli var að í auglýsingunni kom fram að leigjendur fá 50% afslátt af leigunni í desember ár hvert. Það eina sem leigjendur þurfa að gera í staðinn er að ganga vel um.
„Við erum ung læknahjón sem eitt sinn voru á leigumarkaði og sáum að það væri hægt að gera mikið betur,“ sagði Sveinn í auglýsingunni en leiguverð var 265 þúsund krónur. Allur kostnaður var innifalinn í verðinu, þar með talið háhraða internet og húsgögn.
„Við setjum metnað í leiguíbúðirnar okkar og innréttum þær eins og við værum sjálf að flytja inn á draumaheimilið okkar,“ sagði hann.
Margar athugasemdir voru skrifaðar við færsluna og sáu margir ástæðu til að hrósa Sveini og eiginkonu hans. „Ég bara get ekki annað enn hrósað ykkur fyrir sanngjarna leigu og að veita afslátt í desember. Það mættu sko margir leigusalar taka ykkur til fyrirmyndar,“ sagði ungur maður í athugasemdum á meðan kona bættið við:
„Sjaldgæft að maður tárist við að lesa leiguauglýsingar.“
Sveinn birti svo aðra færslu í gær þar sem hann þakkaði fyrir þau góðu viðbrögð sem auglýsingin fékk. „Fengum yfir 80 fyrirspurnir og verður eignin að fallegu heimili fyrir litla fjölskyldu von bráðar,“ sagði hann.
Hann bætti svo við að þau hjónin fjárfesti eingöngu í grónum og grænum hverfum í nánd við alla þjónustu og miðborg Reykjavíkur. Óskaði Sveinn eftir áhugasömum leigutökum sem gætu haft áhuga á næstu eignum sem fara í leigu í desember eða janúar.
