Átta einstaklingar voru lagðir inn á Landspítalann í gærkvöldi með COVID-19. Alls liggja 78 á sjúkrahúsi vegna veirunnar og þar af eru fjórir á gjörgæslu.
Yfirvöld hafa hvatt landsmenn til að halda sig heima um helgina og sagði Víðir Reynisson yfirlögregluþjónn í hádegisfréttum RÚV að það væri til að draga úr líkum á slysum. Mikið álag væri á Landspítalanum.
„Það komu átta ný tilfelli þar í gærkvöldi á einu bretti víðs vegar að. Þannig að það var erfitt. Og það er búinn að vera erfiður dagur í dag á Landspítalanum,“ sagði Víðir.
Þó að smitum hafi farið fækkandi hefur álagið á Landspítalann ekki farið minnkandi. Nokkuð margir dagar geta liðið þar til alvarleg einkenni COVID-19 fara að gera vart við sig. Þannig greindust 56 smit á föstudag fyrir viku og 75 á fimmtudeginum í síðustu viku. Aðeins nítján smit greindust hins vegar í gær og standa vonir til þess að álagið á Landspítalann minnki næst samhliða fækkandi smitum.
„Við sjáum það að það er á niðurleið og það er jákvætt. Það er alveg ljóst að samfélagslegi svona mátturinn er greinilega að skila sér í því að við erum að fara að byrja að sjá árangur af því sem allir ákváðu að taka þátt í,“ sagði Víðir í fréttum RÚV.
