Flestir kannast eflaust við það að þurfa að þrífa baðherbergi á heimili sínu en skítur á það til að safnast milli flísa og reynist oft erfitt að þrífa. Margir eyða peningum í dýr hreinsiefni og eyða miklum tíma í að skrúbba veggi og gólf.
Ein áströlsk móðir telur sig þó hafa fundið töfralausn við vandamálinu sem er ekki aðeins ódýr heldur fljótvirk. Hún greindi frá málinu í Facebook hóp mæðra í Ástralíu en hennar töfralausn felst í því að blanda saman matarsóda og vetnisperoxíð (e. hydrogen peroxide), sem fæst í flestum apótekum og er notað til sótthreinsunar.
„Mæður! Ég hef ráðið úr gátunni,“ skrifaði konan, sem er sjálf frá Melbourne, en hún sagðist ekki trúa eigin augum eftir að hún notaði blönduna á baðherberginu sínu.
Á myndum, sem breski miðillinn Daily Mail birtir, má sjá afraksturinn en hún blandaði vörunum saman þar til blandan var orðin að hálfgerðu kremi og skrúbbaði svæðið.
Að eigin sögn þurfti hún ekki einu sinni að láta blönduna liggja á svæðinu heldur sá hún árangur samstundis.
Athugið: Rétt er að taka fram að forðast skal að blanda saman bleikiefni, eins og vetnisperoxíð, við önnur efni en öruggt er að blanda vetnisperoxíði saman við matarsóda, að því er kemur fram í frétt Daily Mail. Mikilvægt er þó að fara varlega þegar farið er með slík efni og varast að anda inn gufum.
