Ásthildur Lóa Þórsdóttir, þingmaður Flokks fólksins, óttast að þeir fjárfestar sem fengu að kaupa í Íslandsbanka hafi tekið lán fyrir kaupunum og að láglaunafólk muni á endanum sitja uppi með skuldirnar. Hún tekur söluna á 22,5 prósent hlut í Íslandsbanka fyrir í grein í Morgunblaðinu í dag.
„Fjármálaráðherra hefur upplýst að markmiðið hafi ekki verið að fá hæsta verðið, heldur selja réttum aðilum. Enn er ekki ljóst hverjir þeir eru og það er ekkert víst að fjármálaráðherra fái að vita það frekar en við, því það er eins líklegt að það verði bara nöfn á einhverjum fjárfestingasjóðum sem hugsanlega heita group-eitthvað, án þess að nokkurn tímann verði gefið upp hverjir standi raunverulega á bak við þá,“
segir hún. Ásthildur segir mikið gruggugt við þetta:
„Einn þeirra keypti í gegnum félag sem er með neikvæða eiginfjárstöðu upp á 135 milljónir. Annar sérvalinn snillingur rak einkahlutafélag sitt í þrot árið 2015 vegna skulda við umræddan banka en þykir samt hæfur til stjórnarsetu í honum(!).“
Telur hún líklegt að einhverjir af þessum aðilum hafi fengið lán.
„Já það er aftur byrjað partí á Íslandi eins og 2007 og kannski ekki skrýtið að fjármálaráðherra fullyrði ítrekað að heimilin á Íslandi hafi aldrei haft það betra því þetta er skemmtilegt partí,“ segir hún.
„En á sama tíma berast fregnir af því að einstætt foreldri á lágmarkslaunum sé tæknilega gjaldþrota og þar vanti 83.000 í hverjum mánuði upp á að það geti framfleytt sér og að hjá pari með tvö börn sé rekstrarhallinn tæpar 90.000 á mánuði.“
Hún segir að það komi ekki til greina að sauðsvartur almúginn sitji upp með timburmennina af partýinu: „Flokkur fólksins segir NEI við því. Aldrei aftur!“
