Læknalaust er í bæði Ólafsvík og í Grundarfirði í dag. Þetta kemur fram ífrétt Skessuhorns.
„Þetta eru alveg einstakar aðstæður. Ég held að ég geti alveg fullyrt það að þetta hafi aldrei gerst áður,” segir Jóhanna Fjóla Jóhannesdóttir forstjóri HVE í samtali við Skessuhorn.
Um síðustu helgi urðu forföll á þeim læknum sem áttu að vera þessa vikuna í Ólafsvík og í Grundarfirði. Ekki tókst að manna læknastöðuna í Grundarfirði og hefur verið læknislaust þar alla vikuna. Í Ólafsvík tókst að fá lækni til að sinna störfum þar frá síðasta sunnudegi og fram að hádegi í gær en nú hefur verið læknislaust þar síðan þá.
Í samtali við Skessuhorn segir Jóhanna Fjóla að það sé von á lækni á vakt í Ólafsvík strax í fyrramálið sem mun sinna þeim tilvikum sem koma upp um helgina.
Erfiðlega hefur gengið síðustu vikur og mánuði að fá lækna til að sinna læknisþjónustu á landsbyggðinni og þeir sem koma dvelja stutt í senn og koma svo kannski aftur seinna.
Hægt er að lesa frétt Skessuhorns hér.
