„Ég velti því hins vegar fyrir mér hverju þjóðgarðurinn muni raunverulega skila fyrir þjóðarbúið, sér í lagi þar sem atvinnutækifærin innan marka hans verða takmörkuð,“ segir Ásmundur Friðriksson, þingmaður Sjálfstæðisflokksins, í aðsendri grein í Morgunblaðinu í dag.
Þar skrifar Ásmundur um frumvarp um hálendisþjóðgarð en það nær yfir um 30% af flatarmáli landsins. Ásmundur er ekki mikill stuðningsmaður frumvarpsins og veltir hann fyrir sér tilganginum með því, hvort að jafnvel sé um einhverskonar alþjóðlegt mont að ræða að hafa þjóðgarðinn sem stærstan.
„Það virðist vera markmiðið með frumvarpinu að koma á fót stærsta þjóðgarði í Evrópu og slá þar með ryki í augu Rússa, sem eru nú með einn stærsta þjóðgarðinn sem þekur nærri 11% af öllu landinu,“ segir Ásmundur og bætir við að tækifærin innan þjóðgarðsins verði takmörkuð.
Hann tekur undir það að þjóðgarðar séu mikilvægir fyrir verndun náttúrunnar, þó ekki sé nauðsynlegt að taka 30% landsins undir slíka starfsemi.
„Á það hefur verið bent að skynsamlegra hefði verið að sameina þau landsvæði á miðhálendinu sem þegar hafa verið skilgreind sem sérstök verndar- og friðlýst svæði undir einn hatt hálendisþjóðgarðs. Þjóðgarðarnir á Íslandi eru nú þrír. Í byrjun nóvember kynnti umhverfisráðherra áform um stofnun fjórða þjóðgarðsins á sunnanverðum Vestfjörðum. Þá eru friðlýst svæði og svæði sem njóta sérstakrar verndar í kringum 120 á landinu öllu og þeim fjölgar ört,“ segir Ásmundur í grein sinni sem endar á þessum orðum:
„Hugsunargangur og stjórnkerfi í frumvarpi um hálendisþjóðgarð sem nú hefur verið lagt fram á Alþingi gengur ekki upp. Það er hlutverk okkar að tryggja aðgengi framtíðarkynslóða að sjálfbærum endurnýjanlegum orkugjöfum, jafnt til heimilisþarfa og grænnar atvinnuuppbyggingar.“
