„Er þetta ástand laununum eða bótaupphæðunum að kenna,“ spurði Ásmundur Friðriksson, þingmaður Sjálfstæðisflokksins, í umræðum um störf þingsins við upphaf þingfundar í dag.
Þar ræddi Ásmundur um stöðuna á vinnumarkaði og benti hann á að fyrirtækjum í ferðaþjónustu gangi illa að fólk af atvinnuleysisskrá aftur til starfa.
„Fjöldi atvinnulausra hafnar vinnu, lætur ekkert ná í sig og mæta ekki í viðtöl,“ sagði Ásmundur sem kvaðst sjálfur hafa farið á stúfana og haft samband við Samtök fyrirtækja í ferðaþjónustu sem sögðu frá reynslu sinni frá síðasta sumri þegar erfiðlega gekk að manna ferðaþjónustuna.
Ásmundur kveðst óttast að það sé að endurtaka sig en vandinn nú sé miklu útbreiddari og alvarlegri en ferðaþjónustan átti von á.
„Ég vil telja upp nokkur alvarleg dæmi sem ég fékk upplýsingar um. Fyrirtæki sem starfar um allt land hringdi í 60 fyrrum starfsmenn sína og enginn þeirra vildi koma aftur til vinnu,“ sagði hann og bætti við að sumir hafi það hreinlega betur á atvinnuleysisbótum á Íslandi. Ásmundur nefndi fleiri dæmi:
„Fyrirtæki á höfuðborgarsvæðinu fékk ekki Íslendinga í vinnu því að þeir vildu ekki vinna um helgar. Fyrirtæki á landsbyggðinni fær fólk ekki vinnu því það vill taka sumarfríið fyrst á bótum. Fyrirtæki á landsbyggðinni sem eru í verulegum vanda við að fá fólk. Til dæmis fyrirtæki á Norðvesturlandi sem þyrfti að vera með 25–30 stöðugildi í gisti- og veitingaþjónustu nær bara að manna 12 stöður.“
Ásmundur segir að þetta séu bara nokkur dæmi af þeim sem hann hefur heyrt. „Ég hef heyrt fleiri sögur nær alls staðar af landinu […] og er ekki í samræmi við það sem þingmenn hafa sagt í ræðum í þessum sal um að vilji til vinnu sigri alltaf líf á bótum,“ sagði Ásmundur sem vísaði í nýlegar fréttir þess efnis að 350 manns hefðu misst rétt til atvinnuleysisbóta fyrir að hafna vinnu frá byrjun mars og til loka maímánaðar.
„Það veldur fyrirtækjum tjóni að þurfi að þjálfa upp nýtt starfsfólk og þá nýtast ekki úrræði sem búið er að bjóða upp á. Fyrirtækin fá ekki ráðningarstyrki með nýju fólki sem ekki er ráðið af atvinnuleysisskrá. Niðurstaðan er að ef sama ástand heldur áfram hamlar það viðspyrnu greinarinnar verulega með tilheyrandi auknum og óþörfum kostnaði ríkisins við atvinnuleysistryggingakerfið auk þess sem verðmætasköpun fer hægar af stað,“ sagði Ásmundur sem spurði hvort þetta ástand væri laununum eða bótaupphæðunum að kenna.
Miðstjórn ASÍ sendi frá sér ályktun í dag þar sem hún gagnrýndi meiðandi umræðu um atvinnuleitendur.
„Miðstjórn ASÍ vísar til fullyrðinga nokkurra atvinnurekenda sem birst hafa í tilteknum fjölmiðlum síðustu daga og rætt um meint áhugaleysi atvinnuleitenda um að þiggja boð um vinnu. Látið er að því liggja að atvinnuleysisbætur séu nú svo háar að þær letji fólk til að taka þau störf sem í boði eru. Miðstjórnin minnir á að atvinnuleysi er í sögulegu hámarki. Þau dæmi sem hafa verið nefnd og fjölmiðlar hafa gert að fréttaefni heyra til undantekninga og ekki hafa komið fram fullnægjandi skýringar á þeim, hvorki af hálfu atvinnurekenda né Vinnumálastofnunar,“ sagði meðal annars.
