„Hvaða skilaboð eru það út í samfélagið að börn megi fara að bera eiturlyfjaskammta hér í skólum landsins,“ sagði Ásmundur Friðriksson, þingmaður Sjálfstæðisflokksins, í umræðum á Alþingi í dag um bætt uppeldi, leið til forvarna og lýðheilsu.
Ásmundur þakkaði fyrir umræðuna en málshefjandi var Una María Óskarsdóttir, varaþingmaður Miðflokksins.
Ásmundur sagði mikilvægt að taka þessa hluti alvarlega og spurði hvernig þingmenn væru að stuðla að bættri lýðheilsu í landinu. Nýtti hann ræðu sína til að hnýta meðal annars í Pírata.
„Hér eru í þinginu nokkrar tillögur um aukið aðgengi að eiturlyfjum með neyslurýmum sem eru með ótakmarkað aðgengi. Ef allir fá aðgengi að því þá mun hraði nýrra neytenda til glötunar aukast. Hér er frumvarp sem Píratar hafa lagt fram um afglæpavæðingu eiturlyfjaskammta. Þar eru til dæmis engin aldurstakmörk á því hverjir mega bera eiturlyfjaskammta,“ sagði hann og bætti við að börn í grunnskólum gætu þess vegna verið með neysluskammta á sér án þess að það væri ólöglegt.
Það er þó fleira en afglæpavæðing neysluskammta sem Ásmundur hefur áhyggjur af, til dæmis aukið aðgengi að áfengi.
„Við erum að tala um að vera með auglýsingar á áfengi og heimsendingarþjónustu á áfengi. En það hefur enginn í þessum sal komið með neina tillögu um það að til þess að mæta þessu ástandi, sem mun skapast þegar þessi lög verða samþykkt, að hér þurfi að auka úrræði til meðferðar.“
Ásmundur benti á að nú þegar væru fleiri hundruð manns á biðlistum eftir meðferð.
„Hvað haldið þið þegar afglæpavæðingin og neyslurýmin verða hér á öðru hverju götuhorni. Hvernig verður staðan þá?
Það er enginn að koma með tillögu um það að lýðheilsa fólks verði tryggð með að fá meðferð. Hvernig verður geðheilbrigðismálum á Landspítalanum háttað þegar þessi alda ríður yfir?
Ég segi: Við þurfum að mæta þeim lögum og áhrifum sem við ætlum að hafa í samfélaginu með því að koma á meðferðarúrræðum fyrir þá sem falla í gryfjuna.“
