Ásmundur Friðriksson, þingmaður Sjálfstæðisflokksins, sagði Vigdísi Häsler framkvæmdastjóra Bændasamtaka Íslands vera hetju í athugasemd undir færslu hennar um meiðandi ummæli Sigurðar Inga.
Í færslunni segir Vigdís að Sigurður Ingi hafi látið niðrandi orð falla um hana í boði Framsóknarflokksins í aðdraganda Búnaðarþings um helgina.
Þegar stóð til að taka mynd þar sem þingmenn áttu að bera Vigdísi í planka er Sigurður sagður hafa sagst ekki vilja taka þátt í þessu „með þessari svörtu“. Aðstoðarmaður Sigurðar Inga þvertók fyrir að hann hafi notað þessi orð en Vigdís segist vita hvað var sagt.
„Það er særandi þegar reynt er að gera lítið úr upplifun minni og þegar beinlínis rangar skýringar eru notaðar við það. Ég stend með sjálfri mér þegar kemur að þessu, ég veit hvað ég heyrði, ég veit hvað var sagt. Ég neita að bera ábyrgð á þeim orðum sem ráðherrann viðhafði í minn garð. Duldir fordómar eru gríðarlegt samfélagsmein og grassera á öllum stigum samfélagsins. Þeir smætta verk einstaklinga og gjörðir niður í lit eða kyn,“ sagði Vigdís meðal annars.
„Þú ert hetja,“ bætti þá Ásmundur Friðriksson, þingmaður Sjálfstæðisflokksins við færslu hennar. Þá sendi Diljá Mist Einarsdóttir, þingkona Sjálfstæðisflokksins, henni hjörtu.
„Það skiptir máli að öflug kona eins og þú svo sannarlega ert lúffir ekki fyrir gaslýsingu eins og þeirri sem borið hefur á. Það er mjög mikilvægt og hafðu þakkir fyrir,“ sagði Helga Vala Helgadóttir, þingkona Samfylkingarinnar.
Guðfinnur Sigurvinsson, stjórnsýslufræðingur og aðstoðarmaður þingflokks Sjálfstæðisflokksins, segir Vigdísi eiga miklu betra skilið en þetta „yfirklór“ og „lygaþvælu“. Guðfinnur og Vigdís þekkjast vel enda störfuðu þau samtímis fyrir þingflokk Sjálfstæðisflokksins áður en Vigdís tók við sem framkvæmdastjóri Bændasamtakanna.
Sigurður Ingi hefur nú beðist afsökunar á ummælum sínum en afsökunarbeiðni Sigurðar má sjá hér að neðan.
