„Að ætla sér að sökkva starfsemi Landspítalans í fóstureyðingar fyrir þúsundir kvenna frá Póllandi og Möltu og helst fleiri löndum svo nóg verði að gert að mati Samfylkingarinnar er flótti frá raunveruleikanum og flestir fá kjánahroll af tilhugsuninni,“ segir Ásmundur Friðriksson, þingmaður Sjálfstæðisflokksins, í aðsendri grein í Morgunblaðinu í dag.
Ásmundur skrifar þar um umdeilda þingsályktunartillögu sem snýr að aðgengi einstaklinga sem ferðast til Íslands að þungunarrofi. Átján þingmenn, þar á meðal þingmenn Samfylkingar, Viðreisnar og Pírata, standa að baki tillögunni sem myndi tryggja að einstaklingar sem ferðast hingað til lands í því skyni að gangast undir þungunarrof fái viðeigandi heilbrigðisþjónustu.
Ásmundur hefur gagnrýnt tillöguna og í grein sinni í Morgunblaðinu dregur hann ekki í land. „Líklega er leitun að meira taktleysi,“ segir hann.
Rósa Björk Brynjólfsdóttir, þingmaður utan flokka, er fyrsti flutningsmaður tillögunnar og fær hún kaldar kveðjur frá Ásmundi.
„Rósa Björk Brynjólfsdóttir gat valið sér eitt forgangsmál til að leggja fram í þinginu sem þingmaður utan flokka og er framlag hennar líklega mesta vindhögg sem þjóðin hefur orðið vitni að á þessum fordæmalausu tímum. Í þeirri ógnarstöðu sem þjóðin, heimilin, atvinnulífið og heilbrigðiskerfið er í mætti ætla að forgangsmál þingmannsins stæði til að leggja heimilum lið og atvinnulausu fólki, en annað kom á daginn. Þingmaðurinn Rósa Björk ákvað að leita út fyrir landsteinana að verkefni til að styðja. Í hópi flutningsmanna tillögunnar eru m.a. formenn tveggja stjórnmálaflokka, Samfylkingar og Viðreisnar sem eru greinilega í hópi flóttamanna frá þeim raunveruleika sem blasir við á Íslandi,“ segir hann.
Ásmundur bendir á í grein sinni að í Póllandi til dæmis gildi strangar reglur kaþólsks samfélags um fóstureyðingar. Segir hann að Rósa vilji beita íslenska heilbrigðiskerfinu í pólitísku ágreiningsmáli í Póllandi og í raun víðar eins og frem kemur í tillögunni.
„Renada Kim, blaðakona Newsweek í Póllandi, sagði frá því í þættinum Heimskviðum á Ríkisútvarpinu að allt að 150 þúsund ólöglegar fóstureyðingar færu fram í Póllandi á ári hverju og mannréttindasamtök sem ekki voru nafngreind segðu fjöldann vera á bilinu 100-200 þúsund. Það er því hætt við að tillagan hefði í för með sér töluverða breytingu á kvenlækningadeild Landspítalans sem hefur framkvæmt um 1.000 fóstureyðingar á ári fram að þessu,“ segir Ásmundur og bætir við að honum sé ekki kunnugt um að þeir 18 þingmenn sem að tillögunni standa hafi rætt hugmyndina við forsvarsmenn spítalans.
Í grein sinni rifjar Ásmundur upp ný lög um fóstureyðingar á Íslandi sem voru umdeilt á þinginu eins og í samfélaginu öllu. Hann segir að þessi tillaga fjalli ekki um þá löggjöf og allt tal í þá veru sé til þess fallið að afvegaleiða umræðuna.
„Þingmaðurinn Rósa Björk fékk leyfi til að mæla fyrir einni forgangstillögu á Alþingi sem þingmaður utan flokka. Í heimsfaraldri vegna Covid-19, hruni á þjóðartekjum, með þúsundir heimila í óvissu og atvinnuleysi allt að 25% þar sem það er mest og heilbrigðiskerfið á neyðaráætlun leggur þingmaðurinn fram þessa þingsályktun ásamt öllum þingmönnum Samfylkingarinnar, Viðreisnar og Pírata. Að ætla sér að sökkva starfsemi Landspítalans í fóstureyðingar fyrir þúsundir kvenna frá Póllandi og Möltu og helst fleiri löndum svo nóg verði að gert að mati Samfylkingarinnar er flótti frá raunveruleikanum og flestir fá kjánahroll af tilhugsuninni.“
