„Ég er búin að vera með þessa síðu í sex ár og ég hef aldrei séð stöðuna eins slæma og núna,“ segir Áslaug Guðný Jónsdóttir sem undanfarin ár hefur haldið úti Facebook-síðunni Matarhjálp, neyðarkall, jólaaðstoð fyrir fólk sem er í þröngri fjárhagslegri stöðu.
Áslaug segir að hún hafi ekki orðið vör við jafn mikla ásókn í aðstoð og nú. Orð Áslaugar ríma ágætlega við það sem fram kom á forsíðu Fréttablaðsins í gær en þar var rætt við Vilborgu Oddsdóttur, félagsráðgjafa hjá Hjálparstarfi kirkjunnar, sem sagði að það væri meiri aðsókn nú en undanfarin ár. Hefur umsóknum um aðstoð fjölgað um rúm 40% á 5 mánuðum.
„Við höfum verið með skólatöskur fyrir þá sem eiga ekki skólatösku en aðallega finnum við aukna aðsókn í fötin. Marga vantar úlpur, yfirhafnir, íþróttaföt og sundföt,“ sagði Vilborg í Fréttablaðinu. Undir þetta tók Ásgerður Jóna Flosadóttir, formaður Fjölskylduhjálpar Íslands, sem sagði mikla aðsókn í matargjafir og fatnað.
Áslaug Guðný segir við Hringbraut að það sé í raun alveg brjálað að gera, en á Facebook-síðunni má sjá að Áslaug hefur verið dugleg við að kalla eftir aðstoð og óskað eftir til dæmis mjólk, brauði og áleggi.
„Það er bara matur, matur, matur og það vantar föt á börnin og þetta lífsnauðsynlegasta,“ segir Áslaug sem segir að aðsóknin hafi aukist nú þegar skólarnir eru að fara á fullt. Hún tekur eftir marktækum mun í ár í samanburði við sama tíma á síðasta ári.
„Já, elskan mín mikið meira heldur en í fyrra.“
Áslaug segir allskonar hópar fólks leiti aðstoðar á síðunni; einstaklingar sem búa einir, stærri fjölskyldur og einstæðar mæður með börn sem dæmi. Í þessum hópi séu til dæmis einstaklingar sem hafa misst vinnuna eða eru að bíða eftir greiðslum frá Tryggingastofnun. „Þetta er alveg svakalegt,“ segir hún um stöðuna.
Hún bendir á að ótækt sé að hjálparsamtök eins og Fjölskylduhjálpin og Mæðrastyrksnefnd þurfi að loka yfir sumartímann vegna fjárskorts. „Hvert á fólkið að leita? Hvað þá börnin litlu sem liggur við að gráti úr hungri þegar maður er að koma með matarpokana. Þau ráðast á pokana. Þetta er ekkert gaman.“
Áslaug er stjórnandi síðunnar ásamt tveimur öðrum og segist hún þakklát öllu því góða fólki sem vill láta gott af sér leiða.
„Fólkið á allan heiðurinn skilið, það eru að koma notuð en heil föt til mín núna fljótlega utan að landi. Það eru úlpur, skór og fleira. Það er gott fólk þarna úti í þjóðfélaginu sem vill hjálpa, það er það sem er ómetanlegt,“ segir Áslaug.
Áslaug er öryrki og býr hún með börnum sínum. Hún hefur því góðan tíma til að hjálpa fólki og gerir það með glöðu geði. „Ég sé bara ekkert eftir því. Við munum berjast áfram, það er engin hætta á öðru.“
