Búið er að breyta um nafn á vísinda-, iðnaðar- og nýsköpunarráðuneytinu. Samkvæmt tillögu Áslaugar Örnu Sigurbjörnsdóttur ráðherra heitir það nú háskóla-, iðnaðar- og nýsköpunarráðuneyti.
Áslaug segir í færslu á Facebook að henni finnist heitið endurspegla vel áherslurnar sem hún vill ná fram með því að setja þessa málaflokka saman í einu ráðuneytið.
„Breytingin á stjórnsýslunni er framsækið skref og til marks um þá möguleika sem eru til hagnýtingar hugvits, aukna fjölbreytni atvinnulífsins og fleiri spennandi og verðmæt störf í iðnaði og tæknigeirum. Það er að mínu mati besta leiðin til að styrkja samkeppnisstöðu Íslands,“ segir hún. „Með því að leiða saman í einu ráðuneyti málefni háskóla, vísinda, rannsókna, nýsköpunar, iðnaðar og hugverka skapast grundvöllur fyrir markvissari stefnumótun og stjórnsýslu á þessum sviðum með aukinn vöxt, verðmætasköpun og velsæld í samfélaginu að markmiði.“
