Ás­dís Rán birtir tvær myndir af sér: „Það versta er að margir trúa þessu bulli“

Ás­dís Rán Gunnars­dóttir, fyrir­sæta og at­hafna­kona, birti tvær myndir af sér á Face­book-síðu sinni í dag sem virðast teknar með nokkru milli­bili. Stað­reyndin er þó sú að myndirnar eru báðar mjög ný­legar þó ólíkar séu. Ásdís Rán segir að góð ástæða sé fyrir því.

„Báðar myndirnar eru nýjar, en munurinn er sá að önnur þeirra er tekin af ljós­myndara hjá gulu pressunni,“ segir Ás­dís í færslunni, sem skrifuð er á ensku.

Ásdís Rán hefur dvalið í Búlgaríu að undanförnu og haft það gott í sólinni ef marka má uppfærslur hennar á samfélagsmiðlum.

Ás­dís segist hafa birt myndirnar að gamni sínu, en líka til að minna fólk á að trúa ekki öllu sem það sér eða les. Segir Ás­dís að svo virðist sem ljós­myndararnir hafi átt mjög við fyrri myndina til að láta það líta þannig út að hún hefði bætt á sig, eða allt að 100 kílóum eins og Ásdís segir og vitnar í búlgörsku slúðurpressuna.

Ás­dís segir að gula pressan svo­kallaða geri ýmis­legt til að fólk kaupi blöðin og lesi greinarnar.

„Það skiptir engu máli hversu langt þarf að ganga. Já, ég hef séð verri dæmi en þetta og á hverjum degi er eitt­hvað skrifað um mig. Sem betur fer eru flestar greinarnar góðar, en aðrar eru heimsku­legar og dóna­legar. Það versta er að margir trúa þessu bulli, þetta getur skemmt heilu fjöl­skyldurnar,“ segir Ás­dís sem minnir fólk á að fara var­lega þegar það á­kveður hverju hvað það trúir.