Ásdís Hjálmsdóttir, ein fremsta íþróttakona okkar Íslendinga undanfarin ár, veiktist illa af COVID-19 og lá hún inni á sjúkrahúsi í viku vegna veikindanna. Ásdís keppti á þremur Ólympíuleikum og setti hún bæði Íslandsmet í spjótkasti og kúluvarpi á ferli sínum sem lauk í sumar.
Ásdís er búsett í Svíþjóð en í myndbandi á Instagram-síðu sinni í gærkvöldi varpaði hún ljósi á það hvernig það er að fá COVID-19. Hvatti hún fólk til að fara varlega því ljóst sé að enginn er óhultur þegar veiran er annars vegar.
„Ég veit ekki hvort þið þekkið söguna mína en ég fékk COVID nýlega. Mér fannst mikilvægt að stíga fram og tala því mér finnst eins og fólk, sérstaklega ungt fólk sem er ekki í áhættuhópi, sé að vanmeta þennan sjúkdóm. Ég trúði því sjálf að ef ég fengi þetta yrði ég einkennalaus, myndi kannski missa bragð- og lyktarskyn, en ekki að ég myndi veikjast alvarlega. Ég hafði rangt fyrir mér.“
Ásdís telur sig hafa smitast af eiginmanni sínum fyrir tveimur vikum. Hún segir að einkennin til að byrja með hafi verið virkilega slæmur höfuðverkur og hár hiti sem erfitt var að ná niður. „Svo fór þetta að fara í lungun og eins og þið heyrið núna, þar sem ég sit, þá er ég nánast andlaus. Ég byrjaði að hósta og átti erfitt með að anda og var að lokum lögð inn á sjúkrahús,“ segir hún í myndbandinu en eins og hún bendir á verður hún fljótt móð af því einu að tala.
Ásdís bendir á að hún sé 35 ára og líklega eins hraust og manneskja á þeim aldri getur orðið. Eins og fram kemur hér að framan var Ásdís ein af okkar fremstu íþróttakonum um margra ára skeið og þó hún hafi hætt sem atvinnumaður í sumar hefur hún haldið sér í góðri æfingu í haust og í vetur.
„Ég gerði allt sem ég gat til að vera eins hraust og ég gat. Ég svaf vel, æfði vel, borðaði vel. Ég trúi því að það sé ekkert sem ég hefði getað gert til að vera hraustari þegar ég fékk Covid, en samt fór þetta í lungun og ég var lögð inn á sjúkrahús.“
Ásdís hvatti fólk til að fara varlega nú þegar jólin eru handan við hornið og bóluefni á næsta leiti. „Hvort sem þið eruð ung eða ekki, í áhættuhópi eða ekki, gerið allt sem þið getið til að vernda ykkur því þetta er ekkert grín,“ sagði hún og bætti við að það væri eins og að fara í Crossfit-tíma að fara í sturtu og þvo á sér hárið. Þá segir hún að auðveldar athafnir eins og að fara út að labba með hundinn sé meira en að segja það. Púlsinn fari hátt í 130 slög á mínútu í venjulegum göngutúr.
Ásdís sagðist vera orðin hitalaus og á batavegi en viðurkenndi að langt bataferli væri fram undan við að vinna upp þol og byggja sig upp að nýju.
