Ásdís Kristjánsdóttir, aðstoðarframkvæmdastjóri Samtaka atvinnulífsins, er í nýskipuðum starfshópi sem á að meta efnahagsleg áhrif sóttvarnaraðgerða. Hún er í forvitnilegu viðtali við Jón G. á Hringbraut um þessi málefni sem og um þann kost í stöðunni hvort ríkið ætti ekki að minnka álögur á einstaklinga og fyrirtæki en sú aðgerð veitti þeim meira súrefni til að auka umsvif sín. Það myndi fjölga tækifærum, störfum og atvinnuleysi minnkaði.
Innan atvinnulífsins finnst núna mörgum sem sóttvarnaraðgerðir ríkisins við landamærin séu of harðar og bitni óþarflega mikið á atvinnulífinu og stórauki atvinnuleysi umfram það sem þyrfti ella að vera – og valdi ríkissjóði þar með óþarflega miklum útgjöldum. Að ávinningurinn af þessum aðgerðum sóttvarna vegi ekki upp tjónið sem það veldur fyrirtækjum og einstaklingum í ljósi þess að færri virðast veikjast jafn alvarlega af veirunni og áður.
Þau Jón ræða m.a. hvort sá tímapunktur sé ekki að nálgast hér á landi að lifa verði með veirunni enda sé veirulaust samfélag ekki í sjónmáli í bráð.
Fram kemur hjá Ásdísi að þetta sé hárfín lína sem ríkið og samfélagið þurfi að fara og ekki auðvelt að draga hana. Ríkið mildi högg atvinnulífsins með stórauknum ríkisútgjöldum til að draga úr atvinnuleysi - sem og að verja á sama tíma yfir 80 milljörðum á þessu ári í atvinnuleysis- og hlutabætur.
En Ásdís telur einnig að skoða verði rækilega þann kost að minnka skattaálögur á fyrirtæki og einstaklinga til að auka súrefnið til fyrirtækja og einstaklinga og fjölga þar með tækifærum, nýjum störfum og draga þannig úr atvinnuleysinu.
