Arnar Grant og fyrrverandi eiginkona hans, Kristín Hrönn Guðmundsdóttir, hafa sett glæsihýsi sitt á Arnarnesi á sölu. Þetta kemur fram í frétt Fréttablaðsins.
Um er að ræða 232,3 fermetra einbýlishús með frístandandi 61,2 fermetra bílskúr. Þá kemur fram að eignarlóðin sjálf sé 1118 fermetrar „á rólegum og eftirsóttum stað með sjávarútsýni“.
Húsið er á tveimur hæðum og í því má finna heitan pott, arinn, fataherbergi og margt fleira. Hægt er að lesa nánar um eignina á fasteignavef Fréttablaðsins.
Mbl.is greindi fyrst frá þvíað húsið væri komið á sölu. Þar kemur fram að þau festu kaup á húsinu árið 2011 og hafi þau síðan gert húsið upp. Þá segir jafnframt að Arnar og Kristín selji nú húsið eftir að þau fóru hvort í sína átt eftir að upp komu um samband Arnars og Vítalíu Lazareva.
